Magnacun

Tuts quels che vulevan ir questa stad en Engiadina Bassa cul tren han stuì midar a Susch sin ils autos da posta per cuntinuar lur viadi. La Viafier retica sto renovar sin quel tschancun varsaquants tunnels. Igl era previs da concluder las lavurs per oz. Ma gia avant emnas ha la VR stuì communitgar ch'ella dovria anc in mais pli ditg. In dals tunnels ha num Magnacun e sa chatta sin il territori da Guarda vi d'ina costa stippa nua ch'il terren sa mova durant decennis. Probabel deriva quest toponim dad ina famiglia che sa numnava Magnocca, forsa in surnum per magnucca. Ma quest tunnel ha custà uschè blers raps che nus pudessan era patratgar al mises da Cumbel che ha num Magnacogna e vul dir «Maglia la chogna!»