Guarda

In exempel tranter blers che mussa co che il rumantsch vegn duvrà en l'economia. Ils organisaturs din ch'il num tunia frestg ed autentic, era las secziuns portan nums rumantschs sco «plaschair» u «ragischs». Il verb «guardar» vegn duvrà en Engiadina ed en Surmeir en la furma «vurdar». La derivanza è germanica, «wardon» signifitgava observar e proteger. La segunda muntada pudain nus anc constatar en las exclamaziuns sco «Dieuminaguarda!» u «Dieunuardi!». Ed era sche en Surselva è il verb «mirar» dominant udin nus a clamar ils Tschellauers «uarda!», era sch'els n'èn betg stads a mirar l'exposiziun.