Passa 220 banchins datti sin il territori da la vischnanca da Segl. Uss ha la vischnanca relaschà in stop per ulteriuras pussaivladads da seser. Fin almain la fin da zercladur 2016 na vegnia betg pli a dar novs banchins sponsurads a Segl. Sco che Markus Kobler, suprastant da Segl ha declerà a RTR hajan ins uss l'emprim da far inventar cun ils bancs existents.
Limitar il temp d'existenza
Plinavant vul il cussegl communal surlavurar danovamain il concept per il sponsoring dals banchins en lain. Surtut duai la durada ch'in banchin fa parada cun il num dals sponsurs esser limitada. Era duess il nov model esser pli liger e movibel, uschia ch'il mantegniment ed er il sgumbrar naiv u tagliar erva enturn ils banchins davent pli facil per ils collavuraturs communals.
Tar ils bancs existents vala ina durada da 10 onns. Suenter vegnia quel allontanà e fatg plaz per in auter banc d'in sponsur ch'è sin ina glista da spetg.
Quant ch'il sponsoring d'in banc a Segl vegn a custar en avegnir e sch'i dat insumma anc quella pussaivladad da cumprar in «monument da regurdientscha», decida la suprastanza da Segl ils proxims mais.
