Era sche la plievgia da matg è giavischabla, avain nus adina puspè «dis da pumpa». In'auditura vuless savair, tge che quell'expressiun signifitgescha. Ella correspunda a la moda da dir «ün di bellezzas» u «in bellezia di» e vegn duvrada en emprima lingia en l'Engiadina.
La pumpa en quest connex n'è betg ina pumpa da velo u ina pumpa d'aua d'alimentaziun u ina da las bunamain 50 pumpas che nus chattain en il Pledari grond, ma deriva dad in pled grec e latin ch'ha fatg sia via en il tudestg cun la furma «Pomp», e che nus enconuschain plitost en furma da l'adjectiv «pumpus».
