La figura da James Bond è d'engraziar al autur englais Ian Fleming. Entschet ha tut cun ses cudisch Casino Royale. En tut ha el scrit 12 romans deditgads a la figura da James Bond e 9 istorgias curtas.
007 - devi propi?
Daco ch'el è gist sa decidius per 007 sco code per l'agent dal MI6 ha Ian Fleming mai tradì. I dat bleras speculaziuns. Ina è quella ch'il code deriva dal matematicher ed astronom John Dee che viveva en il 16avel tschientaner. Lez duai esser stà agent per la Queen Elisabeth l'emprima e haja ina giada suttascrit ina brev cun 007.
In num nunspectacular daventa in num spectacular
Da nua ch'il num James Bond deriva, ha Ian Fleming dentant tradì. Igl è il num ord ses cudesch preferì "Birds of the West Indies" scrit dal ornitolog Dr. James Bond. Ian Fleming ha tschertgà in num simpel, curt, nunpersunal, anonim, betg romantic e masculin. Per el saja James Bond stà il num ideal.
