Era sch'el è insatge natiral e ch'el pussibilitescha il mantegniment da nossa spezia, è il ciclus feminin anc adina tabuisà. Blers discurran pli gugent da dis da frajas, d'avair visita ubain da l'arrivada da l'armada cotschna che da dir «menstruar». Products menstruals vulan anc adina dar da crair ch'ina menstruaziun ideala saja «discreta», «schubra» ed «invisibla». Sch'ellas han in gramfli durant la lavur, pretendan bleras dunnas plitost avair mal il chau che da proclamar ch'ellas menstrueschan.
Danunder vegn quest tabu, e na fissi betg uras d'al trametter a Chicago?
L'ultim temp fa la menstruaziun dentant era pli e pli savens si'entrada en las discussiuns politicas:
Èsi en urden che dunnas pajan fitg autas taxas sin products menstruals mo perquai che quels na valan betg «sco essenzials»?
E fissi era d'introducir en Svizra in «congedi menstrual» per dunnas cun fermas dolurs, sco quai ch'i vegn bainprest ad esser il cas en Spagna?
En questa Marella raquintan diversas dunnas da lur emprima menstruaziun, dal viver cun dolurs, ma era dals muments nua ch'ellas han gugent lur menstruaziun.
Davart dolurs betg necessarias, l'observar l'agen corp e las influenzas dal spiert sin noss ciclus vegnin nus plinavant a discurrer cun Graziella Montalta e Josianne Hosner.
