Wolfgang Niedecken che ha bainspert 67 onns, è in musicist, ghitarrist e cumponist tut spezial. Sias chanzuns n'han betg texts englais ubain tudestgs, sia lingua è il «Kölsch», il tudestg da la citad da Cologna.
Cumenzà ha tut la fin dals onns 70 sin in areal d'ina fabrica a Cologna, sper in'autrostrada. Là ha la band BAP fatg sias emprimas provas e sias emprimas chanzuns. In da lur imnis è «Verdamp lang her», ina da las chanzuns predilettas da Wolfgang Niedecken, il manader da la band. Là raquint'el da la relaziun cun ses bab. Quel era mort durant che Niedecken era cun la band sin turnea. En sia chanzun fitg persunala, ina conversaziun imaginara cun ses bab, discurra el da la vita, temas, quitads e speranzas e – cun retard – prenda el cumià.
La chanzun daventa in hit, er sche blers auditurs na chapeschan betg bler dal text en «Kölsch». E per la band BAP è quai la chanzun la pli impurtanta ch'els sunan anc adina tar mintga concert.
