Il di basest

Oz pon puspè s'allegrar tut quels che festiveschan lur di da naschientscha sulettamain mintga quatter onns! Propi curius che nus avain mintga quatter onns in onn basest u basiast en Surselva e Surmeir e bisest en Engiadina. Da Ftan fin Zernez avain nus quest adjectiv sincopisà sin bsest. El deriva dal latin bissextus e vegniva inserì sis dis avant la fin dal mais, damai ils 24 favrer, uschia ch'i deva dus dis che eran sis dis avant Chalandamarz. A Sevgein eran ils abitants persvadids che «onns basiasts duei ins buca far nozzas», ma quels da Ftan seguan il proverbi «On bsest, on da maridas»!

Redacziun: Chasper Pult