Manuela Pfrunder deriva dal Seetal en il chantun Lucerna, ha studegià grafica a la scol'auta d'art e cumposiziun a Lucerna e silsuenter avert ses agen pitschen atelier da grafica.
Be segunda en la concurrenza
Il 2005 è ella vegnida dumandada da sa participar ad ina concurrenza d'ideas per las novas bancnotas. Là è sia idea vegnida sin il segund plaz. La banca naziunala ha dentant decis che sia proposta saja la meglra per realisar en furma da bancnotas.
Uschia ha ella survegnì l'onn 2007 l'incumbensa definitiva e silsuenter stuì tegnair secret tut durant 11 onns. Da lezzas uras ha la giuvna graficra da 26 onns er stuì emploiar nova glieud per insumma pudair realisar il project.
Entschattas en il Grischun
Las emprimas lavurs vi da las novas bancnotas ha Manuela Pfrunder fatg en il Grischun a Valzeina ensemen cun ses partenari Adrian Heuberger. Els èn dentant bainprest turnads a Turitg perquai che la collavuraziun cun la banca naziunala è daventada pli e pli intensiva.
