Ils 29 da november dal 2001 è mort George Harrison, in dals 4 Beatles. Il pli mudest ed il pli calm. Er pli tard, durant sia carriera da solist e tar ils «Traveling Wilburys» cun Roy Orbison, Bob Dylan, Tom Petty e Jeff Lynne è el stà in da paucs pleds, pero cun bunas ideas per cumponir chanzuns.
El era il pli quiet dals Beatles, in pau en la sumbriva da John Lennon e Paul McCartney che han cumponì la gronda part da las chanzuns ed ils hits dals «Fab four». Pero er George Harrison saveva cumponir. Da sia penna derivan fitg bellas chanzuns sco «Here comes the sun», «Taxman» e «While my guitar gently weeps». Ed er suenter la separauziun dals Beatles ha el gì divers hits cun «Run so far», «I got my mind set on you» e surtut «My sweet Lord», in toc che mussa er la relaziun ch'el aveva cul hinduissem.
Questa chanzun n'ha pero betg portà blera fortuna. Be in mais suenter la publicaziun hai da in plant da plagiat. Harrison duai avair engulà la melodia da la gruppa «The Chiffons», ina gruppa vocala da giuvnas populara en America. Il 1963 han ellas gì in hit nr. 1 cul toc «He's so fine» – e 7 ons pli tard cumpara lura «My sweet Lord» da Harrison. Las sumeglientschas eran evidentas, e suenter in process da divers onns hai da ina cunvegna. El n'haja betg fatg aposta quel plagiat. Char esi pero stà tuttina: Harrison ha stuì pajar a la fin in'indemnisaziun da 1.6 milluns dollars, ha pero gì l'onur davair fatg il plagiat il pli renumà da listorgia da musica.
