Il resultat da la lavur dad otg onns saja extraordinari. Per l'emprima giada saja avant maun in dals pli cumplets genoms d'ina planta. Cun lur perscrutaziun pudessan ils scienzads revoluziunar la tratga da novas rosas cun novas furmas, odurs u colurs. Ina pussaivladad è er da trair rosas pli resistiblas a donnegiaders ni rosas che dovran main aua.
La rosa Old Blush tutga tar las pli veglias dal mund. Konfuzius ha descrit ella gia 500 a.C., en il 18avel tschientaner è la Old Blush arrivada da l'Asia en l'Europa. Ella porta er il num rosa da la China.