Purtrets
Ladina Kirchen - «Jau poss regalar in surrir di per di»
In di en la vita da la meglra emprendista da FAGE dal Grischun – Ladina Kirchen da Scuol ha fatg l’emprim plaz tar ils campiunadis chantunals da professiun. Cun quella buna prestaziun po la giuvna da 18 onns en mintga cas guardar positiv envers ils examens finals d’emprendissadi en in pèr mais – Noss redactur Lukas Quinter ha accumpagnà Ladina Kirchen durant in’entir di per chattar ora pertge ch’ella ha merità quai titel sco meglra emprendista da FAGE dal Grischun.5 min
Per amur da la pasch – in onn uvestg Joseph Maria Bonnemain
El haja ditg Gea en in mument flaivel, sa regorda Joseph Maria Bonnemain. Avant in onn ha Papa Francestg telefonà e nominà el sco uvestg da Cuira. Dapi lura sajan las tensiuns tranter conservativs e progressivs sa calmadas, conflicts dettia quai dentant anc adina en l’uvestgieu. Quai è la bilantscha dal uvestg suenter in onn. Il film mussa, co che l’atmosfera è sa midada, co ch’el ha integrà las dunnas e la giuventetgna e co ch’el confruntescha l’uvestg cun temas brisants. Ch’el na mussia betg adina colur vegn crititgà – tut per l’amur da la pasch?26 min
Quels da las LIRICAS – Orange, Flepp e Jusht
A chaschun da lur concert final a l’Open Air Lumnezia 2022 repetin nus sco omagi a las Liricas Analas il film «Quels da las Liricas» da l’onn 2016.26 min
Rita Christen – l'emprima presidenta dals guids da muntogna svizzers
Rita Christen è in’excepziun. Ella è ina da las paucas dunnas guidas da muntogna. En Svizra èn quai mo gist 40, mo 2.5% dals guids svizzers èn dunnas. E lura quai: Avant dus onns elegia la Federaziun svizra dals guids da muntogna ina dunna sco lur presidenta, Rita Christen da Mustér. Sia elecziun ha procurà per massa reacziuns en las medias, tuttas unanimamain positivas. Il film dals «Cuntrasts» dat in’invista en sia lavur da presidenta, el mussa dentant era la guida Rita Christen en ses ravugl famigliar e durant sia disciplina preferida, il raiver. Nus emprendain ad enconuscher ina dunna plain vita, cun ina gronda passiun per ils culms, cun ina energia nunstanclentaivla e nus accumpagnain ella sin la ruta da raiver «Schildkrötengrat».26 min
«SUENTER LA PLIEVGIA VEGN IL SULEGL» – In omagi a mia tatta
«Na sun jau betg tut spalada?», dumonda Johanna Petschen-Cathomas avant mintga filmada. Esser rugalada bain, sco ella di, saja impurtant – era uss cun 102 onns. Per il film da «Cuntrasts» ha Paula Nay accumpagnà sia tatta durant plirs mais cun la camera. «Jau sun cuntenta cun mia vita e na poss betg chapir, ch’jau sun vegnida uschè veglia». In recept per la cuntentientscha n’ha Johanna betg, dentant: Ella ha realisà quai ch’ella ha vulì – sulet maridar na vuleva ella mai. «Jau n’hai betg gì be rosas en mia vita, sun dentant adina stada persvadida che suenter mintga plievgia vegn il sulegl».25 min
Alessio Schmed - «I sto er plover per che las flurs pon crescher»
Dissegnar sin palpiri, paraids, pullovers e pel – quai fa Alessio Schmed. Ina via professiunala ch'el ha decis dad ir suenter avair rut giu ses emprendissadi sco pictur. Ina via per quella ch’el è sa decis er suenter experientschas cun substanzas psicedelicas, quellas na giogan nagina pitschna rolla en ses art.15 min
Corsin Tuor – dirigent cun corp ed olma
Cun 16 onns ha Corsin Tuor dastgà diriger l’emprima gia in marsch tar la Societad da musica Trun. Suenter in pèr tacts perda el la survista. Questa emprima emprova na tementa betg il giuven Corsin. Pauc pli tard fundescha el il Quartet instrumental da Trun ed in pèr onns pli tard il Cerchel musical da la Surselva. Oz è Corsin Tuor in dirigent renconuschì en la scena da brass naziunala ed internaziunala. El è schef-dirigent da la Bayerische Brass Band Akademie ch’è dapi onns campiun da la Germania. Medemamain è el dirigent dad ina da las pli excellentas bands austriacas e dapi 11 onns dirigia el la Brass Band Berner Oberland (BBO), ina da las pli capablas brass bands da la Svizra tudestga. Il film da «Cuntrasts» raquinta da la passiun da Corsin Tuor ed accumpogna el e la BBO a lur ultima concurrenza svizra da brass communabla a Montreux, nua che lur speranzas na sa cumpleneschan betg dal tut. In film da Bertilla Giossi26 min
Daniel Meuli - il stagner, scrinari, artist e fotograf
L'artist Daniel Meuli fotografescha dapli blers onns cun ina camera usche gronda sc'in char annex. Ses motivs èn las muntognas, lais e las valladas da l'Engiadina. Ussa va el in pass vinavant e bajegia ina nova, ina pli gronda camera.10 min
Seraina Friedli - la golia
L’Engiadina n’è betg gist il lieu ideal per cumenzar ina carriera da ballape. Malgrà che las pussaivladads da trenar èn mediocras, n’ha Seraina Friedli betg laschà starmentar. «Jau hai stuì cumbatter per mia carriera e quella qualitad ha manà mai schizunt en l’equipa naziunala svizra», di la golia da 29 onns. Ils «Cuntrasts» han accumpagnà ella durant plirs mais – da la fadia cun blessuras e las stentas da chattar in nov club, tar la rolla sco golia da reserva fin tar il kick da pudair esser l’ultima speranza da l’equipa.26 min
Tut che tira flad – Arno Caluori e sias orglas
Durant la stad mussan ils «Cuntrasts» lur selecziun dals onns passads. Questa giada ina repetiziun dals 1. da november 2020.26 min
