Cantus firmus surselva (dir. Clau Scherrer), l'ensemble vocal incantanti (dir. Christian Klucker) e la Brass Band Berner Oberland (dir. Corsin Tuor) han preschentà a Trun «Perlas rumantschas III». Quest terz disc cumpact è tant la culminaziun sco era la finiziun dal project «Perlas rumantschas, chanzuns rumantschas arranschadas per chor e brass band», in project inizià da Corsin Tuor.
Il project unescha las duas pitgas impurtantas da nossa cultura da musica, il chant da chor cun la musica instrumentala. RTR ha registrà il concert da la sonda dals 16 da mars a Trun, e quai en il rom dal Festival da la chanzun rumantscha. L'Artg musical porta l'entir concert che cuzza duas uras.