Pervi da la decisiun da producir pli pauc ieli è il pretsch per ieli grev creschì d'in di a l'auter per 5%. La decisiun definitiva per quant che las terras da l'OPEC reduceschan la producziun croda però pir il november. Fin lura pudess il pretsch per benzin ed ieli da stgaudar schizunt anc vegnir pli bunmartgà, uschia Francesca Romano. Motiv: Il mument vegn producì bunamain tant ieli sco anc mai. Ed era suenter la decsiun definitiva na saja betg da quintar cun ina mancanza d'ieli, uschia Romano vinavant.
Concurrenza tranter Arabia Saudita e Stadis Unids
Motiv che las terras da l'OPEC vulan uss auzar il pretsch da l'ieli cun reducir la produziun è la concurrenza tranter l'Arabia Saudita ed il Stadis Unids. Avant dus onns aveva l'Arabia Saudita inizià il sbassament dal pretsch per sfurzar ils Stadis Unids da chalar da producir ieli cun la metoda da Fracking - ina metoda per cuntanscher ieli en grondas profunditads. Cun quasi 'inundar' la fiera d'ieli vuleva l'Arabia Saudita far ch'il Fracking daventia memia char. La metoda è dentant vegnida sviluppada vinavnat, uschia ch'ils Stadis Unids san producir vinavant rentablamain er tar in pretsch bler pli bass. Il sajet e pia ì davos ora per l'Arabia Saudita. Ussa patescha ella ed anc autras terras sezzas dal bass pretsch e vul perquai puspe auzar el.
RR actualitad 11:00