Siglir tar il cuntegn

Header

audio
Leonie Moll cusseglia dad ir tal coiffeur a cumprar schampo.
RTR, Fabia Caduff
laschar ir. Durada: 3 minutas 18 Secundas.
cuntegn

Tge schampo è il gist per mai?

Ti n'enconuscha betg la situaziun: Ins è en butia e stat davant il regal cun ils schampos ed ins è dal tuttafatg surdumandà – Tge schampo è uss il gist per mai?

Il pli simpel per chattar il gist schampo è dad ir suenter la structura dals chavels. Cun chavels fins e plats sa recumonda in schampo da volumen. Per chavels cun ritschas èsi impurtant da prender in schampo che dat umiditad als chavels e cun chavels gross pon ins quasi prender mintga schampo.

Però pli impurtant che la structura dal chavel è la pel dal chau. Sch'ins ha ina sitga pel dal chau lura duess ins prender in schampo che porscha umiditad.


Silicon en ils schampos

Betg mintga schampo gida als chavels. En la maioritad dals schampos è en silicon. Plitost en ils schampos ch'ins po cumprar en butia. Perquai vala la paina da cumprar ils schampos direct tar il coiffeur.

Leonie Moll, coiffeusa: «Ils schampos en butia han quasi tuts en silicon»

Il silicon cuverna il chavels e sin il prim mument ha il silicon era in effect positiv. La cuverta dal silicon sin ils chavels procura ch'ils chavels glischan. Dentant è quai be il prim effect. Il silicon rumpa ils chavels.

Per chattar or sch'i ha en silicon ni betg en il schampo ston ins guardar bain las ingredienzas. Suandantas finiziuns da las ingredienzas èn indizis sin silicon:

  • oxane
  • cone
  • conol
  • glycol

Schampos senza silicon han per pli si in tatgader che fa attent sin quai. La gronda part dals schampos natirals n'han era betg en silicon.


Betg duvrar adina il medem schampo

Ins na stuess betg duvrar adina il medem schampo per ils chavels. La coiffeusa Leonie Moll recumonda dad adina puspè midar schampo.

«Il chavels sa disas vi dal schampo e lura na hal betg pli il medem effect»

Sch'ins lava mintga di ils chavels, lura cusseglia la coiffeusa da prender mo ina giada schampo. Sch'ins lava mo mintga 3 fin 4 dis ils chavels, lura duess ins lavar ils chavels 2 giadas per rablar ora tut la merda.

Ideal fissi sch'ins lavss mintga segund di ils chavels.

Dapli da «Co e cum»

Scrollar a sanestra Scrollar a dretga