«Far bler cun pauc è anc oz mes motto»
«Jau giaud mia pensiun ed oravant tut mes quatter biadis» – di Ursula Bandli Caviezel da Castrisch.
Creschida si è la protagonista da nossa cuschina dal november a Pitasch. Là manava sia mamma pli baud l’ustaria e la stizun dal vitg. Ses bab era pur.
Ursula Bandli ha gia fitg baud emprendì da cuschinar. Sco sora da quatter mattatschs, la puraria ed il manaschi d’ustaria e stizun, n’avevia Ursula betg autra schelta che truschar en las chazzettas. Bainspert ha Ursula emprendì da sia mamma da far bler cun pauc, quai saja anc oz ses motto. Cun pauc possian ins far plats delizius, di la dunna da 67 onns.
En cuschina dovri pazienza e temp.
En in tschert senn è Ursula Bandli Caviezel ida en ils fastizs da sia mamma. Sco sia mamma han Ursula Bandli e ses um Hanspeter manà duas ustarias sco er la stizun dal vitg a Castrisch. En il mais da november ans raquinta la Ursula Bandli davart sias experienzas sco ustiera, davart ses respect per natira e tut ils products che quella ans regala e davart la satisfacziun ch’i dat, da pudair giudair l'atun ina chaminada bain plaina.
Enstagl da fluras regal‘jau savens in cup tuargia da paira.
Ursula e Hanspeter Bandli han vesì bleras bellas parts dal mund. Sagiar plats tradiziunals d'autras terras saja fundamental per dunna Ursula. Savens ha ella era purtà a chasa in u l’auter recept che ha persvas.
Jau prov tut, pli exotic e pli gugent.
Sisum la glista culinarica stat per Ursula Bandli Caviezel, la cuschina taliana. Gronda stima e fascinaziun haja ella dentant era per nossa cuschina grischuna.
