Siglir tar il cuntegn

Header

cuntegn

Maria e Clemens Pfister «Chispàcius» – innovativ, simpatic e per tuts

Capuns, maluns, bulzani, salsiz e chaschiel da la regiun, ma era pettas e turtas tutgan tar il program da pupragnar ils giasts. Anna Maria e Clemens Pfister han avert avant prest 10 onns lur ustaria da scua a Schlans. En il mais da mars preschentan els tar RTR il «Chispàcius».

Che Anna Maria Pfister Casanova, anteriura bibliotecara e droghista daventia in di ustiera, haja ella mai siemià. Igl è prest 10 onns che ses um Clemens ha gì l’idea d'avrir ina pitschna ustaria da scua en lur curtin a Schlans. Damai che las ustarias a Schlans eran dapi intgins onns serradas ha Anna Maria prendì serius l’idea da ses um. Ditg e fatg! Trais emnas pli tard, atun 2011 han Anna Maria e Clemens avert lur curtin sco ustaria da scua.

Numnà han els lur lieu da sentupada «Chispàcius». Il num che sa cumpona dal lieu nua lur chasa sa chatta, «Chispà» e dal pled «delicius». Il «Chispàcius» sa chatta gist dasper la Senda Sursilvana ed è uschia in lieu ideal per sa fermar e sa recrear per viandants, velocipedists, ma era per vischins da Schlans ed auters vitgs.

Tar nus na sto nagin patir fom.
Autur: Clemens PfisterResort cuschina, iert e fluras

Il trend da viandar e da far turas cun velo da muntogna ha augmentà marcantamain il dumber da giasts dal «Chispàcius». Ils giasts ch'arrivan cun fom e said èn tar Anna Maria e Clemens en buns mauns.

Fai quai che ti sas, cun quai che ti has, nua che ti stas!
Autur: Anna Maria PfisterPatruna e experta da pettas.

Sirups, turtas, pettas, spaisas chaudas sco maluns, capuns, bulzani èn delicatessas da basa per maldisar ils giasts da tuttas uras dal di. Products regiunals, frestgs e genuins èn la devisa tar ils Pfisters.

Dis da bell’aura essan nus bleras uras en cuschina.
Autur: Anna Maria PfisterPatruna dal Chispàcius

Il pèr che viva gia 30 onns a Schlans ha repartì cleramain ils pensums da lavur. Anna Maria è la dunna da las pettas, ambient e service. Clemens tgira il departament cuschina chauda, flurs ed iert.

Causa la pandemia da corona è il «Chispàcius» restà serra ils davos mais. Anna Maria e Clemens han profità dal temp per experimentar e lavurar vid lur purschida. Uschia vulan els porscher ina u l’autra surpraisa innovativa a lur giasts.

En il mais da mars ans preschentan Anna Maria e Clemens Pfister lur filosofia e las spaisas che procuran per giasts cuntents en il «Chispàcius».

RTR Nossa cuschina 10:15

Artitgels legids il pli savens

Scrollar a sanestra Scrollar a dretga