Il cusseglier guvernativ da Zug e president da lOK da la Festa federala da lutga Heinz Tännler estimescha ch'enturn 300'000 persunas vegnan a visitar Zug en ni ordvart l'arena da lutga. 300'000 persunas en in lieu? Tras quai pudessan las fatschentas localas far grond gudogn? Betg automaticamain, di Heinz Rütter ch'è expert da consequenzas economicas tar eveniments da gronda dimensiun. Per che las fatschentas localas possian profitar da quai ston ellas era vegnir integradas en il concept dals organisaturs.
Collavuraziun da fatschentas localas
Cura ch'ils organisaturs han fatg il concept, han els era integrà las fatschentas localas, di Heinz Tännler envers SRF. Ins haja dà grondas incumbensas a las fatschentas localas, sco per exempel a pasterners. Per che quels sappian far frunt, hajan blers collavurà stretg in cun l'auter.
Positiv era a lunga vista
Tut en tut smina Heinz Tännler che la festa savess purtar enturn 30 fin 40 milliuns francs a la regiun da Zug. Quai saja bler per in eveniment da gronda dimensiun, sco el di vinavant. Vinavant dettia studias che dian che l'attractivitad d'in vitg ni citad creschia suenter da quels gronds eveniments da sport.
