WASP-121b, uschia sa numna in exoplanet extraordinari. El n'ha betg ina furma radunda sco i è per ordinari il cas. WASP-121b ha ina furma sco in ov e sumeglia in American Football. Quai ha da far cun las forzas da rotaziun. Quest planet rotescha numnadamain fitg stretg enturn in punct fix. Quellas forzas èn lura uschè fermas ch'ellas stgarpan bunamain dapart il planet.
Fitg chaud
WASP-121b è in exoplanet. Quai munta ch'el n'è betg en noss sistem solar. Uschia è el fitg lunsch davent da la terra e n'è betg da vesair en il tschiel. La distanza tranter la terra ed il planet è numnadamain enturn 900 onns da glisch. Cun la forza da la rotaziun ha la surfatscha dal planet enturn 2500 grads. La surfatscha dal sulegl per exempel è circa 5000 grads chauda.
Catapult da metal
L'exoplanet cumpiglia fitg bler metal. Tranter auter magnesium e fier. Sco menziunà è il planet fitg chaud. Uschè chaud ch'i lieua e svapurescha ils metals che vegnan catapultads en l'orbit.
