In «plug-in» è atgnamain mo in pitschen extra per il program d'internet. Durant la pandemia èn differentas sviluppadras e sviluppaders mess sin il martgà plug-ins davart il tema corona.
In tool interessant porta il titel Covid News Blocker. Quel program datti tant per Google Chrome, dentant er en moda sumeglianta per Safari u Firefox. Il plug-in fa quai ch'il titel empermetta: Adina ch'il program chatta in text u in artitgel davart il tema coronavirus, blochescha el quel. Ins vesa lura nagin text pli, dentant mo in quadrangul cun si il pled «censured».
In pau pli pac radical è il CoronaBlocker. Quel program datti per Google Chrome, dentant er en moda sumeglianta per Firefox e Safari. Il plug-in remplazza mintga giada il pled «coronavirus» atras in auter pled. Quel pled pon ins definir sez.
Co installar in plug-in?
Installar plug-ins van tar mintga browser in pau auter. Da principi chattan ins dentant tut quai ch'ins dovra en las configuraziuns sut il chavazzin «plug-in», «Add-on» u «Erweiterung». Là datti er ils links per chattar differents plug-ins. En las configuraziuns pon ins er puspè deactivar u deinstallar ils plug-ins.