Per la chantadura americana Roberta Flack che ha uss 81 onns è la chanzun «Killing me softly» dal 1973 in grond success, ina chanzun che va sut la pel ed i para ch'ella saja vegnida cumponida aposta per ella. Quai n'è pero betg il cas, il toc è ina reprisa d'ina chanzun da la chantadura Lori Liebermann. Il 1971 va ella cun 20 onns ad in concert da Don McLean ed è talmain impressiunada, ch'ella prova da scriver ina chanzun. Il duo d'auturs Norman Gimbel e Charles Fox gida e cumponescha in toc ch'exprima ses sentiments.
I resta tar quai, fin che Roberta Flack auda il toc. Durant in sgol cun aviun taidla ella chanzuns dal program da divertiment ed il toc da Lori Lieberman la fascinescha. Ella dumonda a Quincy Jones sch'el pudess organisar las notas da «Killing me softly», e pauc pli tard ha ella in hit nr. 1, e quai daventa sia chanzun clav. Pli tard datti lura anc bleras autras versiuns, la pli interessanta ed enconuschenta è quella dals Fugees.
