Siglir tar il cuntegn

Header

audio
Sin il program stattan cumposiziuns da Anton Reicha, Louis Spohr, John Field, e Muzio Clementi.
Pixabay
laschar ir. Durada: 59 minutas 31 Secundas.
cuntegn

Cumponists en l'umbriva

Enstagl da Beethoven, Mozart u Haydn udis Vus en quest'emissiun ovras da cumponists ch'èn main enconuschents.

Ils nums che han marcà il svilup da la musica èn enconuschents a blers. Durant l'epoca classica a Vienna èn quai stads Joseph Haydn, Wolfgang Amadeus Mozart e Ludwig van Beethoven – la uschenumnada «Trias da Vienna». Da lur temp hai però er dà auters umens da renum en la scena da musica.

In da quels è Anton Reicha (1770-1836) ch'è er stà in ami da Beethoven e Haydn. El è vegnì enconuschent sco teoreticher da musica. Furora ha el cunzunt fatg cun sias cumposiziuns per instruments a flad.

Las cumposiziuns da Louis Spohr (1784-1859) èn per l'ina influenzadas da quellas da Mozart, ma per l'autra ha el er integrà elements da l'epoca classica cun quella da la romantica tempriva. Uschia han cumponists da renum sco Mendelssohn, Schumann, Chopin u Brahms er cumpareglià sias cumposiziuns cun quellas da Beethoven. Louis Spohr ha cunzunt scrit bler per la violina.

L'instrument favurit da John Field (1732-1837) è il clavazin. Il cumponist, ch'è oriundamain da l'Irlanda, ha pli tard cunzunt vivì en Russia. Sias cumposiziuns pon ins cumparegliar cun quellas da Chopin.

E la finala stat in'ovra da Muzio Clementi (1752-1832) sin il program. El è stà il scolast da John Field ed er el è stà in virtuos da clavazin. Tut quai ch'el saveva da quest instrument, ha el mess sin palpiri en in cudesch d'emprender, l'uschenumnà «Gradus ad parnassum». En pli ha el er construì clavazins. Uschia na fai betg surstar ch'i stat sin ses crap fossa «The father of the pianoforte», pia il bab dal clavazin.

Musica – ils ultims tocs

Dapli da «La classica»

Scrollar a sanestra Scrollar a dretga