«Chau, char uffant»

Igl è in tabu: Sche mammas bandunan la famiglia e vivan senza lur uffants. Quellas mammas fruntan savens sin nunchapientscha e ston cumbatter cun pregiudizis.
Trais mammas raquintan lur istorgia: da la decisiun d'ir davent, da la critica e da la vita senza ils uffants. Romana Plaz, ch'è ida davent da la famiglia cun quatter figls causa d'in burnout. Frieda Cossham, ch'è s'inamurada en in auter um e ha perfin scrit in cudesch davart la vita senza sias duas figlias. Ed era Zaklina Bäbler raquinta, ella è ida en l'ester senza ses figl per motivs professiunals.

Ultra da quai laschain nus vegnir a pled in figl pertutgà. Ed Yv Nay, che perscrutescha las differentas furmas da famiglias sin il champ sociologic, explitgescha ils motivs, pertge che mammas, che bandunan lur famiglias, vegnan savens crititgadas fermamain. Yv Nay propona era, tge che mintgin e mintgina da nus po prender a mauns per rinforzar l'acceptanza e la toleranza envers persunas che na correspundan betg ad ideals. Ideals ch'èn fitg derasads en nossa societad, sco per exempel l'ideal da la mamma perfetga.