En il center da l'emissiun stattan dus cudeschs che cumenzan tuts dus cun in funeral. Preschentà vegn il thriller talian «La fonte del male» da Susanna Salerno e «Das Dorf der Nichtschwimmer» dad Urs Augstburger. Ils giasts dal Magliacudeschs èn questa giada Marcella Pult e Flurin Caviezel.
En «La fonte del male» perdan pliras persunas lur vita sut circumstanzas misteriusas. Il roman è ambientà en Bregaglia ed en Engiadin'Ota, nua cha l'autura e psicologa Susanna Salerno viva dapi blers onns.
Pli patgific èsi a Dadens, in lieu che sumeglia fitg Mustér. Là vegn quintada l'istorgia da duas famiglias e quai sur trais generaziuns. Ina saga da famiglia cun scharm sursilvan.
Il tip da la magliacudeschs Salome Michael è «Baba Dunjas letzte Liebe» dad Alina Bronsky, in'istorgia commoventa d'ina dunna veglia che turna a Tschernobyl.
