Per cumpensar in zichel quel temp senza concerts e festas da chant en natira, emetta RTR en l'emissiun Noss chors ina seria da concerts ord noss archiv. L'entschatta dat il valent Chor viril dalla Lumnezia. «Laud ed engraziament» – quai è stà il motto dal 11avel e davos concert dirigì da Clau Scherrer. Cooperà han lezza giada l'ensemble deCanto (dir. Retus Giger) ed il pianist Gieri Maissen. Dals 9 da matg 2015 datescha nossa registraziun fatga a Trun en la baselgia da s. Martin. Sin il program ina giada chanzuns indigenas da: Tumasch e Benedetg Dolf, Gion Antoni Derungs, Duri Sialm ed Edaurd Lombriser. E lura chanzuns estras da: Wilhelm Peterson-Berger, Franz Hegar, Hans Lavater, Franz Schubert, Felix Mendelssohn-Bartholdy, Albert de Klerk e Gabriel Fauré.
Redacziun: Giusep G. Decurtins