Quai di il lavurer social Jürg Marguth da Cuira ch'è creschì si a Flem. Sia socialisaziun professiunala è stada quella dal mecanist d'autos, suenter a mecanist da helicopters e la finala anc al pilot. Ma cun 27 onns ha el pervia dad in discletg tar ina midada da plazza stuì s'orientar da nov. El è sa decidì per la lavur cun carstgauns ed ha studegià lavur sociala.
Jürg Marguth ha introducì la lavur sociala da scola en la citad da Cuira ed oz lavura el tranter auter per la Casa Depuoz a Trun sco manader da la partiziun ambulanta.
"La structura da la Casa Depuoz dat la pussaivladad da sviluppar la lavur sociala en l'entir Grischun". E quai stat fitg a cor a Jürg Marguth. Las vischnancas pon quasi cumprar en lavur sociala tar la Casa Depuoz che organisescha tut ed è er responsabla per la qualitad da quella. Ma la lavur sociala en scola ha anc potenzial.
"Ozendi n'èsi betg pli pussaivel d'avair ina scola senza lavur sociala, tut è vegnì uschè cumplex. La scola è ina part dad in sistem ed i na va betg pli senza".