Savens s'intermettian ils geniturs a moda e maniera stentusa, crajend ch'els sappian precis co che la scola ha da funcziunar e tge che lur uffants dovran. Il squitsch da tuttas duas varts saja grond, dentant er bain supportabel sch'ins ama la lavur da magistra.
Professiun da siemi
Ch'ella veglia daventar ina giada magistra, saveva Barbara Camichel-Z'graggen dentant gia adina. Sustegn per cuntanscher quella finamira, ha ella survegnì surtut da sia sora pli veglia. Quella ha tratg si ella sco in agen uffant, suenter la mort da lur mamma.
Tras in barat inter-famigliar avant 21 onns han ils Camichels midà lur rollas classicas. L'um Joos è restà a chasa per tgirar ils dus mats ils emprims onns, entant che la mamma ha lavurà 100% sco magistra.