Siglir tar il cuntegn

Header

audio
Mario Cavigelli
RTR Claudia Cathomen
laschar ir. Durada: 57:35 minutas.
cuntegn

Mario Cavigelli – Quai è in dals pli gronds sbagls da mes bab

Quai di il cusseglier guvernativ e president da la regenza Grischuna dal 2021, Mario Cavigelli, davart il fatg che ses bab, in Rumantsch, n'ha betg discurrì cun ses uffants rumantsch.

Mario Cavigelli ha emprendì rumantsch en scola chantunala, a curs, cun leger gasetta e tadlar radio – e cun duvrar la lingua durant il temp d'uffizi. Per sia carriera politica haja el profità da savair rumantsch.

Il 2021 è Mario Cavigelli per la terza giada president da la regenza Grischuna. Tenor el dovran politichers in zic ina pel dira, cunzunt er en vista a las medias socialas, nua che la critica è magari dira. Quai fetschia part dal job.

Ma el ha er gia gì motiv d'avair tema, per exempel lura cura ch'ins ha stuì sajettar l'urs M13. Durant quel temp ha Mario Cavigelli survegnì protecziun da la Polizia chantunala.

Ma da principi è el in politicher che vesa il positiv e ch'ha ina gronda confidenza en ils auters. El ha però er gia gì grevs muments, e quai durant il temp ch'el è stà per l'emprima giada president da la regenza Grischuna. Lura è sia dunna vegnida grevamain malsauna e suenter mez onn morta da cancer.