Da ses bab ch'è reverenda ha il nov directur da RTR prendì cun sai valurs sco respectar in l'auter, communitgar avertamain, acceptar autras vistas e differentas perspectivas, ma er valurs cristianas.
Ch'il grond sto esser l'interessant è ina malchapientscha. Savens saja precis sutsura. Pli pitschen ch'ins è e dapli libertads ch'ins haja e dapli ch'ins possia empruvar ora. Quai di Nicolas Pernet davart ses motiv da midar dal concern Ringier tar RTR. 10 onns ha el lavurà per Ringier en differentas funcziuns, suenter avair studegià a Son Gagl e suenter segiurns a la University of Michigan e l'École des Hautes Études Commerciales de Paris. Il 2010 ha el promovì a Son Gagl.
Cun el sco nov directur na vegnia per il public fidaivel betg a sa midar bler tar RTR. Ma per quels che na taidlan RTR hai num: tadlai bain, nus essan pronts, stai attents, nus ans occupain bainprest da vus. Sche Nicolas Pernet ha in'idea, lura na po quai betg ir spert avunda cun realisar quella. Jau sun in zic gnervus sche jau sent ch'insatge na va betg vinavant.
