Ursina Haller, oriunda da Zernez, ha passentà sia mesa vita sin laissa. Cun 28 onns ha ella finì la carriera da profi. Quai è stà avant sis onns. «Ina cesura betg be simpla», raquinta Haller. Entant ha ella chattà ina passiun nova: il scriver – il schurnalissem.
Ed in zic nomada è ella restada. Dapi dus onns viva ella en la California, en il Silicon Valley. Là nua che vegn creada la tecnologia dal futur. E precis sur dals avantatgs e cunzunt sur dals privels da quella, rapporta ella adina puspè en gasetta – ed en quest Profil.