La gruppa da Bienna «Pegasus» fan gia dapi il 2003 ensemen musica e s'audan gia daditg tar las bands da pop svizras cul pli grond success. Atgnamain avessan Noah Veraguth (chant, ghitarra e clavazin), Gabriel Spahni (bass e chant), Stefan Brønner (battaria) e Simon Spahr (chant e ghitarra) planisà da dar in grond concert en il Hallenstadion a Turitg. Sco bler auter è era quel vegnids unfrenda da corona. Persuenter han els registrà in album unplugged cun insaquants da lur gronds hits. Per preschentar quel han els tranter auter fatg in stop giu tar noss collegas da RSI per far ina live-session.
In duo cun blera energia
Diesch onns suenter la band svizra, pia il 2013 èn ils dus englais Mike Kerr (chant e bass) e Ben Thatcher (battaria) sa mess ensemen ed han fundà il duo «Royal Blood». Il medem onn han els accumpagnà ils «Arctic Monkeys» durant dus concerts ed eran la fin dal 2013 nominads per il BBC Sound of 2014. Quai è ina prognosa da la BBC cun acts ch'els fan quint che vegnan ad avair success en l'onn proxim – tge ch'è lura era savens il chass. Era tar «Royal Blood» ha la BBC gì raschun. Dus albums ha il duo da rock publitgà ed il terz «Typhoons» suonda l'avrigl 2021.