Hits africans – novalv'emna

22.08. ed ils 23.08.2015

Purtret da Fally Ipupa. Bild in Lightbox öffnen.

Legenda da maletgs: Fally Ipupa REUTERS

    • 22.08.2015 Fally Ipupa - Original - Congo

      Fally Ipupa (Nsimba) è in chantautur, sautunz e producent, oriund da Kinshasa Congo, naschì ils 14 da december 1977, ed undrà gia cun numerus awards africans. En sia giuventetgna ha el sunà en diversas bands, profitond da sia vusch zunt lomma e fina. L’onn 1999 è el daventà commember e lura er gist manader dal Quartier Latin International, la band da Koffi Olomidé. Il 2006 ha Ipupa lantschà sia carriera solista, cun l’album «Droit chemin», ch’ha vendì passa 100’000 exemplars. In onn pli tard è el cumparì a l’Olympia da Paris. Grond success er per ses proxims albums (p.ex. quel cun il bel titel «Arsenal de belles Melodies» 2009). Il 2014 è Fally Ipupa vegnì envidà da Barack Obama en la Chasa Alva a Washington per il grond entaup cultural «US-Africa». PS: Pervia da sia bella partia vegn Ipupa magari er numnà «Di Caprio» en ses pajais.

      5:48 min

    • 23.08.2015 Afel Bocoum - Ali Farka - Mali

      Derivond dal medem lieu Niafunke e da la medema etnia dals Sonhai/Sonrai, ha Afel Bocoum (1955) ditg musicà ensemen cun ses mentur Ali Farka Touré. Preferind instruments indigens sco la njarka (gia monocorda), la njurkle (flauta), la calabascha e la djembe (percussiuns). E pli gugent suna el la ghitarra acustica envers quella electrica. Ils emprims 80 ha Bocoum fundà sia atgna gruppa Alkibar, impundend quella tranter auter er per derasar sias experientschas agronomicas, pertutgond irrigaziun ed economia da l’aua. Sias chanzuns chanta el per part en la lingua Sonrai, per part er en il Tamaschek dals Tuareg u il Fulfulde dals Fula. Enfin la mort d'Ali Farka (2006) han ils dus adina sunà vicendaivlamain sin lur albums. Il 2002 ha Bocoum collavurà sin l’album Mali Music dal musicist englais Damon Albarn. PS. In’anecdota: Cur che Afel Bocoum è stà 2001 en il Brasil, ha el declerà che ses prenum «Afel» muntia «affecziun». Dapi lura dovran para blers brasilians il pled «afel» per exprimer «affecziun».

      5:04 min