Intgins exempels concrets datti gia, co turists ed indigens pon collavurar:
- Accumpagnar in chatschadur ed observar las selvaschinas
- Accumpagnar in pestgader
- Guardar co mastergnants lavuravan pli baud, per ex. cun far schlondas
- Far paun
- Emprender d'enconuscher la cultura sco per ex. baselgias e chapluttas
- Visitar il museum dal vitg ubain il museum da cristals
- Porscher aventuras
Il president da vischnanca Peter Binz è persvadì ch'il turissem funcziuneschia en ina regiun sco la Val Medel mo cun sustegn dals indigens. Perquai veglian els collavurar per pudair porscher als turists las bellas aventuras ch'ina vischnanca en las muntognas possia porscher.
Sa posiziunar en ina nischa
Il biro Planval accumpogna il project. E la strategia dal manader dal project Lorenz Kurtz è da cuntanscher buns resultats cun sa posiziunar en ina nischa. Blers turists tschertgian ozendi il ruaus, ina natira intacta ed il contact cun indigens.
Suenter il lavuratori hajan intginas persunas gia survegnì l'incumbensa da cumenzar cun la lavur, di Peter Binz. Las infurmaziuns vegnian publitgadas sin la pagina d'internet da la vischnanca. Per far attents al project veglian els era esser preschents a l'exposiziun Guarda/Züspa cun in stan.