Siglir tar il cuntegn

Header

audio
La marca sin ils velos dal servetsch «Rent a Bike Valtellina».
RTR, Anna Caprez
laschar ir. Durada: 2 minutas 43 Secundas.
cuntegn

Purschida sin duas rodas perfin sur cunfin

Il servetsch «Rent a Bike Valtellina» datti dapi il 2014. Dapi in onn pon ins era prender a fit in bike gia a Poschiavo, e viagiar cun quel sur il cunfin da la Svizra en l'Italia. Uschia s'augmenta la purschida en tuttas duas regiuns turisticas.

La dumonda da giasts che vulan prender a fit in bike en la val taliana s'augmenta tenor Gianluca Balzarolo adina dapli. El ha surpiglià ina da las staziuns da «Rent a Bike Valtellina», ed organisescha er il transport dals bikes enavos sur cunfin. Er persunas che han prendì a fit in bike en ina da las staziuns en Italia, arrivan adina puspè fin en la Val Poschiavo e returnan il vehichel tar in dals trais lieus da deposit a Poschiavo.

Viagiar sur cunfin n'è nagin problem

Per passar la duana cun plirs velos emna per emna na dettia nagins problems, uschè Balzarolo. Ils bikes sajan marcads e registrads, uschia ch'il transport regular sur il cunfin succedia senza problems.

Purschida cuminaivla

Grazia al servetsch «Rent a Bike Valtellina» pon tuttas duas regiuns turisticas offrir ina purschida, ch'è en il trend tenor il directur da l'ente turistico Valposchiavo, Kasper Howald. Surtut la via dei terrazzamenti, che maina tras las vignas en la Vuclina, daventia adina pli populara per scuvrir sin duas rodas.
Per entant datti la pussaivladad da fittar in bike ed al returnar er en in auter lieu a: Bormio, Tirano, Sondrio, Colico e nov a Poschiavo. Bain pussaivel saja ch'i dat bainbaud er ina staziun da bikes a Chiavenna

Dapli da «Total local»

Scrollar a sanestra Scrollar a dretga