Siglir tar il cuntegn

Header

audio
Il Chalandamarz a Santa Maria dal 2018, il davos en la furma veglia.
RTR, David Spinnler
laschar ir. Durada: 02:23 minutas.
cuntegn

Val Müstair: Chalandamarz en nova furma

Davent dal 2019 festiveschan ils scolars da la Val Müstair il Chalandamarz cuminaivelmain en l'entira vischnanca. Motiv è ch'i dat fracziuns cun mo pli paucs scolars.

Tadlar

Empè ch'il Chalandamarz vegn festivà en mintga singula fracziun per sasez vegn el festivà davent da quest onn en l'entira vischnanca. Quai ha decidì la scola da la vischnanca ch'è fusiunada dapi il 2006.

Da nov cumenza il Chalandamarz la damaun da las sis a Tschierv e finescha la saira cun in cortegi a Santa Maria. Durant il di visitan ils scolars tut las fracziuns da la vischnanca.

Transports cun bus

Per rivar dad ina fracziun en la proxima e per tegnair en l'urari vegn organisà in transport cun bus. Ils custs surprenda la Bus Val Müstair GmbH. Cun la Biosfera Val Müstair ha la scola chattà in ulteriur sponsur che porta ils custs per novas chapitschas e faziels unitars per tut ils scolars.

Tenor Giancarlo Conrad, in dals magisters primars che ha lavurà ora il nov concept per il Chalandamarz è da spetgar cun reacziuns multifaras. Sch'ins midia ina tradiziun veglia saja quai adina ina chaussa sensibla. El di dentant: «Nus na pudain betg striunar uffants or dal chapè.»

Suenter la fusiun da las scolas e quella da las vischnancas saja uss oramai temp da fusiunar era il Chalandamarz.

Guardar sch'il concept sa verifitgescha

Il Chalandamarz dal 2019 saja da vesair sco prova per vesair tge che funcziuneschia bain e tge main. Lura saja da trair bilantscha e da tut tenor adattar tschertas chaussas per ils onns suenter, uschia Giancarlo Conrad.

Ins saja stà avert per ina nova furma dal Chalandamarz uschia ch'ins saja segir era avert per midaments vi dal concept per l'avegnir.