Matthias Grünert è il nov professur da linguistica

L'universitad da Friburg ha tschernì Matthias Grünert da 3 candidats, e la regenza dal chantun Friburg ha confermà questa nominaziun.

Matthias Grünert surpiglia la professura rumantscha l'1. d'avust. Cun interrupziun succeda el uschia a professur Georges Darms ch'è ì en pensiun la stad 2012. Reacziuns positivas Las emprimas reacziuns grischunas sin la tscherna da Matthias Grünert per la professura a l'universitad da Friburg èn positivas. Grünert saja in um "profilà" dal fatg. Il cusseglier guvernativ Martin Jäger è cuntent ch'il studi da rumantsch saja uschia garantì. La mesadad da las lecziuns vegnan ad avair lieu en la Scol'auta da pedagogia a Cuira. Grünert ha 47 onns e stat cun sia famiglia a Peseux dasper Neuchâtel. Da preschent lavura el anc sco redactur dal Dicziunari Rumantsch Grischun a Cuira e sco collavuratur scientific dal seminari da romanistica da l'universitad da Turitg. (rtr/fc/mür)