La situaziun avant ch'il mir è vegnì bajegià

Suenter la segunda guerra mundiala 1945 è la Germania vegnida partida en quatter zonas d'occupaziun, las qualas vegnivan mintgamai controlladas dals stadis alliads l'Uniun Sovietica, ils Stadis Unids, la Gronda Britannia e la Frantscha. En il medem mument è era l'anteriura chapitala dal Reich Tudestg vegnida dividida en quatter secturs. Per part è era vegnì erigì barrieras tranter ils singuls secturs.

La Germania e Berlin spartida en las differentas zonas d'occupaziun Bild in Lightbox öffnen.

Legenda da maletgs: La Germania e Berlin spartida en las differentas zonas d'occupaziun RTR

Dumonda e lubientscha per burgais da Berlin da l'ost a Berlin dal vest Bild in Lightbox öffnen.

Legenda da maletgs: Dumonda e lubientscha per burgais da Berlin da l'ost a Berlin dal vest Archiv Federal Germania

Davent da quest temp duvravi lubientschas per surpassar ils cunfins dals secturs. Gia in onn pli tard è vegnì fundà sin cumond da l'Administraziun militara da l'Uniun Sovietica en Germania ina polizia da cunfin. Curt suenter ha la guerra fraida cumenzà tranter il vest e l'ost. Berlin è daventà ina regiun centrala nua ch'ils servetschs secrets spiunavan ora in l'auter.

La DDR e la BRD vegnan fundadas

Ils 23 da matg 1949 è vegnì fundà en ils trais secturs dal vest la Republica Federala Tudestga (BRD). Intgins mais plitard, ils 7 d'october è lura vegnì fundà en il sectur occupà da l'Uniun Sovietica la Republica Democratica Tudestga (DDR). Entant che la BRD ha transferì la sedia da la regenza a Bonn ha la DDR numnà Berlin (factic dentant l'ost da Berlin) sco chapitala da la DDR.

Las differenzas politicas han manà 1948/49 tar ina bloccada economica en il Berlin dal vest. Quella bloccada han ils alliads dal vest surmuntà cun ina punt aviatica.

In mir per ch'il pajais na perdia betg ses burgais

Logo da la Partida unitara socialista da la Germania (SED) Bild in Lightbox öffnen.

Legenda da maletgs: Logo da la Partida unitara socialista da la Germania (SED) RTR

La Partida unitara socialista da la Germania (SED) discurriva gia 1952 da bloccar il cunfin vers Berlin dal vest. I mancava dentant ina lubientscha da l'Uniun Sovietica e da l'autra vart na fiss quai strusch stà pussaivel pervi dal traffic. Avant ch'il rintg da la viafier enturn il vest da Berlin è stà a fin era la viafier da la DDR numnadamain dependenta da pudair passar tras il Berlin dal vest.

Tranter 1945 enfin la construcziun dal mir da Berlin èn var 3,5 milliuns persunas fugidas or da la zona d'occupaziun sovietica. Damai ch'i sa tractava bleras giadas da persunas cun buna scolaziun periclitavan quellas fugias l'economia da la DDR e betg sco ultim era il dumber d'abitants. Sper la mancanza da forzas da lavur procurava il barat da valutas ch'il marc da la DDR daventava adina pli e pli flaivel. Era rauba da tut gener ch'era pli bunmartgada svaniva en il vest e fascheva donn per l'economia.

Il mir da Berlin vegn construì Bild in Lightbox öffnen.

Legenda da maletgs: Il mir da Berlin vegn construì Keystone

Per evitar tut quai ha la SED decidì da cumenzar ils 13 d'avust 1961 cun la construcziun dal mir. Da vart uffiziala avevi num che la NATO planiseschia ina guerra. La moda e maniera sco la bloccada è dentant vegnida construida mussava dentant cler ch'il mir cun ses indriz da defensiun n'eran betg bajegiads cunter l'inimi mabain cunter l'agen pievel.

La construcziun dal mir ha era dà la pussaivladad che differentas mesiras administrativas han pudì vegnir introducidas. Quellas avessan avant gidà nagut perquai ch'il pievel fiss fugì ord l'agen pajais. In exempel è l'introducziun da l'obligatori da prestar servetsch militar.

Suenter la construcziun dal mir han blers commembers da la SED e fidaivels burgais, gì la speranza ch'ins possia finalmain bajegiar si il socialissem e che tut ses avantatgs daventian finalmain vesaivels. Il pajais ha lura era fatg in moderà svilup economic che ha procurà ch'i deva cuntinuadamain auzaments da paja. Quella politica è lura er vegnida mantegnida suenter ch'il svilup economic entras la construcziun dal mira era gia daditg passà. La producziun da la DDR è adina stada dependenta da la BRD.