La mustra

In giuven um da 18 onns cun il numer 410 sin il tricot stat sin ina chomma amez in rintg en la sala da gimnastica. In'instructura cumonda da serrar ils egls e curt suenter da laschar pender il chau davos giu. In mument po el tegnair l'equiliber, ma lura cupitga el. "30,5" constatescha l'instructura. L'exercizi bizar pussibilitescha da valitar cun ina cifra la coordinaziun dal giuven. El sto far "la mustra", la recrutaziun, ensemen cun 65 auters umens giuvens or dals chantuns Grischun, Son Gagl ed Appenzell. Durant dus dis ston els far tests da sport en il center da recrutaziun a Mels e laschar examinar lur sanadad fisica e psichica en numerus exercizis. Al computer ston els respunder nundumbraivlas dumondas intimas che duain permetter da dir schebain els sajan "tauglich" u "untauglich", pia abels da far servetsch militar u betg. Mo sch'els hajan era veglia da far militar na dumonda nagin. Lezza dumonda ha Martin Cantieni fatg a Markus Baumann, da Bever, Lucian Bischof da Cuira/Ladir e Joel Denzler da Buchs/Sent.