"Giuridicamain dubius da lubir vendita da dumengia"

I saja giuridicamain dubius ch'il chantun Grischun lubeschia vinavant la vendita da dumengia en il Designer Outlet a Landquart, malgrà la decisiun dal Tribunal federal dal favrer che quai na saja betg legal. Quai di in expert dal dretg public: Peter Hänni ch'è professer a l'Universitad da Friburg. Tenor Haenni avess il cussegl federal d'intervegnir e guardar che la decisiun dal Tribunal federal vegnia respectada.

Il Designer Outlet a Landquart venda vinavant er las dumengias. Bild in Lightbox öffnen.

Legenda da maletgs: Il Designer Outlet a Landquart venda vinavant er las dumengias. Keystone

Betg applitgar ordinaziun che n'è anc betg en vigur

Il chantun Grischun sa basa en sia decisiun sin ina moziun dal cusseglier naziunal tessinais Fabio Abate ch'il parlament federal ha approvà dacurt. En l'avegnir duai quai numnadamain esser pussaivel da tegnair avert era la dumengia centers da cumpra en regiuns turisticas. Abate aveva pensà en emprima lingia vi dal center da cumpras Foxtown a Mendrisio. Il chantun Grischun quinta dentant che l'ordinaziun per realisar quella proposta resguardia alura era il Designer Outlet a Lanquart, e motivescha uschia sia decisiun da lubir vinavant, provisoricamain, la vendita da dumengia, enfin che la nova regla giaja en vigur. Per Peter Haenni è questa argumentaziun fitg problematica. Ins na possia betg simplamain applitgar ina lescha, da la quala ins supponia be ch'ella giaja x-in di en vigur, senza ch'ins sappia cura e co, manegia l'expert da dretg public.

Ristg per las plazzas da lavur porta la firma

Al chantun Grischun vai en emprima lingia per mantegnair plazzas da lavur en il center da cumpras che fetschia in terz da sia svieuta las dumengias. La vendita da dumengia dettia quai gia dapi tschintg onns ed i na fissi perquai betg commensurà da metter en dumonda uss 80 enfin 100 da las var 400 plazzas da lavur. Ch'i saja da respectar il principi da la commensurabladad, manegia era il professer da dretg public. Ma quai principi na sappian ins betg strapatschar ad libitum sco i paria e plaschia. Ed insumma: Il ristg per las plazzas da lavur dals emploiads haja la firma prendì e betg il Tribunal federal. (rtr/cls)

Co reagescha l'Unia sin l'agir dal chantun?

Suenter che il chantun Grischun ha decidì da tolerar vinavant la lavur da dumengia en il Designer Outlet a Landquart è per l'Unia cler, che quai na saja betg acceptabel. Quai scriva il manader regiunal dal sindicat dal Grischun e la Svizra Orientala, Thomas Wepf, en ina charta da lecturs.

Outlet venda vinavant la dumengia - ad interim

Il Designer Outlet a Landquart po vinavant avirir sias portas la dumengia. Quai sch'i va tenor l'uffzi chantunal per industria, mastergn e lavur.