Diesch cineasts, diesch purtrets, ina collecziun naziunala

Il kino svizzer, marcà da sias diversitads geograficas, linguisticas e socialas, prenda nus sin viadis lontans. Ils reschissurs helvetics na tematiseschan betg mo las diversitads che distinguan la Svizra, mabain surpassan ils cunfins e raquintan al public naziunal ed internaziunal istorgias che animeschan da reflectar e schlargian l'orizont. En accord cun la tradiziun da las grondas collecziuns deditgadas a la lavur creativa ­svizra (litteratura, design, architectura), sa legran la SRG SSR e sias unitads d'interpresa da preschentar diesch purtrets da 26 minutas, deditgads als cineasts impurtants da noss pajais. Auturs, cineasts, realisaturs, montaders, tecnicists e producents da las quatter regiuns linguisticas naziunalas han mussà, mintgin cun ses talent e ses sensori, las vias originalas da questas persunalitads, mettend il focus sin vistas nunusitadas. Mintga film curt preschenta il cineast e sia lavur. El resguarda la cronologia, metta l'ovra en ses context social e politic e dat il pled als protagonists. La collecziun preschenta ils films che han marcà in'epoca e fatg sensaziun, preschentond la Svizra d'ina perspectiva differenta.

Daniel Schmid (1941 – 2006)

Daniel Schmid l'onn 2003 a Flem Bild in Lightbox öffnen.

Legenda da maletgs: Daniel Schmid l'onn 2003 a Flem Keystone

L'Hotel Schweizerhof a Flem al ha dà las emprimas inspiraziuns. Là, en l'hotel da ses geniturs, ha Daniel Schmid passentà si 'uffanza. Ils giasts nobels e fins han sveglià la fantasia dal pitschen Daniel. La sala d'entrada dal hotel eran sia tribuna. Uschia è Schmid daventà in raquintader d'istorgias, quai ch'el è restà si 'entira vita d'artist. Vita e lavur, tar Daniel Schmid è quai adina stà collià stretgamain. Il film purtret sur da Schmid, publitgà en la seria CINEMAsuisse da la SRG SSR, sfunsa en si 'uffanza a Flem, mussa sia fugia or da la vita stretga muntagnarda per ir en la citad da Berlin dals onns 60 e da ses inscunter decisiv cun Rainer Werner Fassbinder. Sia ierta filmica è enorma vasta. Da las emprimas ovras radicalas sco "Heute Nacht oder nie" enfin tar la satira popular-politica "Beresina". Si 'ovra la pli marcanta è dentant il film documentar sur da la Casa Verdi a Milano: "Il bacio di Tosca", ina decleraziun d'amur a las chantaduras d'operas attempadas e sur dils musicists che na rivan betg da sa distatgar da la vita da tribuna. Cun "Zwischensaison" ha Schmid serrà il rudè ed ha mussà a la publicitad l'origin da sia vita e da si 'ovra. Daniel Schmid na pudev'ins betg reducir sin ina rolla. El discurriva pliras linguas (inclusivamain in zic rumantsch), ha realisà films dramatics e documentars ed ha er inscenà operas. E cun ses scharm è el adina er stà bun da entusiasmar glieud da tut il mund per sias ideas. Cuntrari a la moda tipic helvetica aveva el insumma naginas temas da contacts cun il glamour, ed el aveva er il curaschi dad empruvar da tschiffar las stailas. Il film vegn caracterisà da la vusch marcanta da Daniel Schmid e da sia vista subjectiva dal mund: "Was heisst schon Wahrheit in einem Leben?" Daniel Schmid aveva l'abilitad da siglir da la realitad supponida vi tar ina ficziun realistica.

Il film davart Daniel Schmid vegn emmess en ils Cuntrasts dals 2 da december 2012.