Jean-Jacques Rousseau (1712-1778)

Il genevrin Jean-Jacques Rousseau vala sco ina da la figuras centralas da l'illuminissem, ed ensemen cun Voltaire sco bab da la Revoluziun franzosa. Rousseau è naschì avant exact 300 onns a Genevra. El era in um cun interess multifars: filosof, cumponist, perscrutader da la natira e scriptur, ina persuna cun diversas fassettas, chantuns e cuntradicziuns. El vegniva e vegn admirà, amà, contestà ed odià a medem temp. Rousseau è ina da quellas persuna che na lascha fraid nagin. Ses cudeschs sco "Émile, ou de l'éducation" u "Du contrat social ou principes du droit politique" han fatg furora e chaschunà stgandels il 1762, l'onn ch'els èn cumparids. Sia critica a la civilisaziun e sias ideas davart l'educaziun èn restadas en discussiun enfin oz.

Les lettre à Rousseau

L'SRG SSR ha envidà auturas ed auturs svizzers da scriver ina brev a Jean-Jacques Rousseau en occasiun da ses 300avel anniversari . "Les lettre à Rousseau" èn brevs persunalas da 16 auturas ed auturs ord las quatter regiuns da la Svizra. Questas brevs porschan tant in inscunter cun la persuna e l'ovra da Rousseau sco era cun auturas ed auturs da las autras regiuns linguisticas da noss pajais.

Chatrina Gaudenz

Chatrina Gaudenz Bild in Lightbox öffnen.

Legenda da maletgs: Chatrina Gaudenz RTR

Chatrina Gaudenz, naschida il 1972 a Lavin, è creschida si en l'Engiadina Bassa. A Turitg ed a Jerusalem ha ella studegià scienzas cumparativas da las religiuns e psicologia. Ella è mamma da dus figls e lavura tranter auter sco schurnalista dal Radio Rumantsch a Cuira. Ils maletgs subtil-sensitivs èn caracteristics per la lirica da Chatrina Gaudenz. Ses texts fan part da l'antologia Sbrinzlas - Funken - Scintille: Gegenwartslyrik aus Graubünden.

Iso Camartin

Iso Camartin Bild in Lightbox öffnen.

Legenda da maletgs: Iso Camartin A. Joos

Iso Camartin, naschì il 1944 a Cuira e creschì si a Mustér, ha studegià filosofia e romanistica a Minca, Bologna e Regensburg. Suenter diversas incumbensas d'instrucziun è Iso Camartin daventà il 1985 professer per litteratura e cultura rumantscha a la SPF a Turitg. Dapi l'onn 1997 è Camartin publicist ed autur liber. Dal 2000 fin il 2003 ha el manà la partiziun da cultura da SFDRS. La gronda part da ses romans, essais e raquints èn cumparids en tudestg. Iso Camartin viva e lavura a Turitg ed en ils Stadis Unids da l'America.

Göri Klainguti

Göri Klainguti Bild in Lightbox öffnen.

Legenda da maletgs: Göri Klainguti ANR

Göri Klainguti, naschì l'onn 1945, è creschì si a Puntraschigna en l'Engiadin'Ota. Suenter avair instruì in pèr onns sco scolast secundar, viva Göri Klainguti oz sco pur, scriptur ed artist a Samedan. Ultra da divers cudeschs ha Klainguti era publitgà numerus texts en gasettas ed antologias. Sias lavurs cumpiglian prosa, lirica e texts da teater ch'èn savens satirics. Göri Klainguti ha survegnì il Premi Schiller 2005.

Leo Tuor

Leo Tuor Bild in Lightbox öffnen.

Legenda da maletgs: Leo Tuor RTR

Leo Tuor, naschì il 1959, è creschì si a Rabius ed a Mustér en Surselva. El ha studegià filosofia, istorgia e litteratura a Turitg, Friburg e Berlin. Tuor scriva raquints, essais, columnas ed istorgias curtas per gasettas, antologias e per il radio. Bleras stads è el ì ad alp sco nurser en la Greina. Sia ovra principala, la trilogia Giacumbert Nau (1988), Onna Maria Tumera (2002) e Settembrini (2006), è vegnida translatada en differentas linguas. Leo Tuor è vegnì undrà per sia ovra cun differents premis da litteratura.

Vincenzo Todisco

Vincenzo Todisco Bild in Lightbox öffnen.

Legenda da maletgs: Vincenzo Todisco Keystone

Vincenzo Todisco è naschì il 1964 a Stans. Oz viva el a Razén e lavura sco scriptur e docent a la Scola auta da pedagogia dal Grischun a Cuira. Suenter ses studi da litteratura taliana e franzosa a l'Universitad da Turitg, è el stà redactur da la revista da cultura Quaderni grigionitaliani. Sper la collecziun da raquints Il culto di Gutenberg e altri racconti (Locarno, Dadò, 1999) ha el publitgà plirs romans ch'èn tuts vegnids translatads en tudestg da Maja Pflug. Las ovras Wie im Western (2004), Der Bandoneonspieler (2007) e Rocco und Marittimo (2011) èn tuttas vegnidas edidas dal Rotpunktverlag a Turitg. Todisco scriva er texts per uffants, tranter quels il cudesch illustrà Angelo e la muetta (2003). El è vegnì undrà pliras giadas per sia ovra litterara, tranter auter il 2005 cun il Premi da litteratura dal chantun Grischun.

Anna Ruchat

Anna Ruchat Bild in Lightbox öffnen.

Legenda da maletgs: Anna Ruchat mad

Anna Ruchat è naschida a Turitg il 1959 e viva a Pavia ed a Riva San Vitale. Ella ha translatà en talian ovras da Thomas Bernhard, Nelly Sachs, Paul Celan, Friederich Dürrenmatt, Mariella Mehr e da numerus auters scripturs. Anna Ruchat instruescha a l'ISIT a Milaun co translatar partind dal tudestg. Ella presidiescha la fundaziun deditgada al poet tessinais da la Beat Generation, Franco Beltrametti. Sco autura ha ella publitgà la rimnada da raquints Die beiden Türen der Welt (Turitg, Rotpunktverlag, 2006) - per la quala ella ha survegnì il Premi Schiller ed il premi dal public Premi Chiara - ed il roman Volo in ombra (Pescara, Quarup, 2010). Ella ha er edì differentas collecziuns da poesias: Geografia senza fiume (Udine, Campanotto, 2006), Angeli di stoffa (Tesserete, Pagine d'Arte, 2009) e Terrataciturna (Campanotto, 2012).

Fabio Pusterla

Bild in Lightbox öffnen.

Legenda da maletgs: Keystone

Fabio Pusterla è naschì a Chiasso il 1957. El instruescha litteratura taliana al gimnasi da Lugano ed a l'Universitad da la Svizra taliana. El è poet, translatur e criticher litterar ed ha edì numerusas collecziuns da poesias: Concessione all'inverno (Bellinzona, Casagrande, 1985), Bocksten (Turitg, Limmat Verlag, 2010), Le cose senza storia (Milaun, Marcos y Marcos, 1994), Pietra sangue (Milaun, Marcos y Marcos, 1999), Folla sommersa (Milaun, Marcos y Marcos, 2004), Corpo stellare (Milaun, Marcos y Marcos, 2010), l'antologia Le terre emerse e Poesie scelte 1985-2008 (Turin, Einaudi, 2009) per numnar mo intginas. Il 2007 ha el retschet il Premi Gottfried Keller. El ha translatà en talian l'ovra da Philippe Jaccottet e dad auters auturs francofons. Sias ovras èn vegnidas publitgadas en differentas linguas.

Giovanni Orelli

Giovanni Orelli Bild in Lightbox öffnen.

Legenda da maletgs: Giovanni Orelli Keystone

Giovanni Orelli è naschì a Bedretto l'onn 1928. El è scriptur, poet liric ed essaist e viva a Lugano, nua ch'el ha instruì litteratura taliana al gimnasi chantunal. Ses emprim roman, Der lange Winter, è cumparì il 1965 da la chasa editura Mondadori cun ina prefaziun da Vittorio Sereni (reediziun tudestga: Turitg, Limmat Verlag, 2003). Sia ovra belletristica cumpiglia tranter auter ils cudeschs Ein Fest im Dorf (Turitg, Benziger/Ex Libris, 1974, exaust), Walaceks Traum (Turitg, Limmat Verlag, 2008), Il treno delle italiane (Roma, Donzelli, 1995), Da quaresime lontane (Bellinzona, Casagrande, 2006). El ha era publitgà numerusas collecziuns da poesias, tranter quellas Sant'Antoni dai Padü, poesie in dialetto leventinese (Milaun, Scheiwiller, 1986), Né timo né maggiorana (Milaun, Marcos y Marcos, 1995), Quartine per Francesco (Novara, Interlinea, 2004) ed Un eterno imperfetto (Milaun, Garzanti, 2006). Bleras da sias ovras èn vegnidas translatadas en tudestg e franzos. Il 2012 ha el survegnì, ensemen cun Peter Bichsel, il Grond Premi Schiller.

Lukas Hartmann

Lukas Hartmann Bild in Lightbox öffnen.

Legenda da maletgs: Lukas Hartmann Keystone

Lukas Hartmann vul daventar gia baud scriptur, fa però l'emprim la scolaziun da scolast primar e secundar, studegia alura germanistica e psicologia. El lavura sco cussegliader da giuvenils, redactur da Radio DRS, scolast per schurnalissem, manader da lavuratoris da scriver e sco cussegliader per las medias. El viagia tras l'India, l'America dal Sid e l'Africa e fa in segiurn a l'Istituto svizzero a Roma. Oz è el scriptur liber e viva a Spiegel sper Berna. El scriva surtut romans, romans istorics, istorgias per creschids e per uffants. Sias ultimas publicaziuns: Bis ans Ende der Meere, in'istorgia davart il chapitani James Cook e ses illustratur John Webber, Finsteres Glück e Räuberleben. Lukas Hartmann è l'um da la cussegliera federala Simonetta Sommaruga.

Klara Obermüller

Klara Obermüller Bild in Lightbox öffnen.

Legenda da maletgs: Klara Obermüller Keystone

Klara Obermüller ha studegià germanistica, romanistica ed istorgia a Turitg, Hamburg e Paris. En Svizra è ella enconuschenta sco publicista, sco anteriura commembra dal Literarisches Quartett e sco moderatura da l'emissiun Sternstunde Philosophie. Ella ha en pli lavurà tar il feuilleton da la NZZ, da la Weltwoche e da la FAZ sco era tar la revista d'art e da cultura du. Oz s'engascha ella sco publicista libra, moderatura e referenta. Ella vala sco in'observadra attenta da tendenzas socialas e publitgescha ovras en il sectur da la religiun, da la spiritualitad, da la vegliadetgna e da la demenza. Ses texts vegnan era legids en Germania cun grond interess: l'anteriur minister da la defensiun tudestg, Karl-Theodor zu Guttenberg, è sa servì dad in da ses artitgels senza inditgar la funtauna.

Michèle Binswanger

Michèle Binswanger Bild in Lightbox öffnen.

Legenda da maletgs: Michèle Binswanger mad

Michèle Binswanger ha studegià a Basilea filosofia e germanistica ed ha fatg part da la gruppa d'artists airline. Ella ha manà la redacziun dal magazin d'art e da grafica soDA ed è s'engaschada sco redactura da cultura da la BaZ er en il schurnalissem classic. Ella è stada redactura tar Facts ed ha scrit sco schurnalista libra per numerusas gasettas e revistas. Sco redactura en il ressort da cultura e societad dal Tagesanzeiger/Newsnetz ha ella cumenzà a scriver en il blog da mammas trais emnas suenter che quel era vegnì lantschà. Il december 2010 è ella vegnida tschernida ensemen cun Nicole Althaus sco schurnalista da l'onn. Oz maina ella il blog da mammas ed è er autura (Macho-Mamas). Michèle Binswanger viva cun ses um ed ils dus uffants a Basilea.

Alain de Botton

Alain de Botton Bild in Lightbox öffnen.

Legenda da maletgs: Alain de Botton Reuters

Alain de Botton è naschì a Turitg e viva oz a Londra. El scriva dapi onns cudeschs essaistics ch'ins po numnar filosofic-quotidians. Ses temas èn l'amur, ils viadis, l'architectura e la litteratura. Intginas da sias ovras èn daventadas bestsellers ed ins las po leger en passa 30 pajais. Alain de Botton ha fundà a Londra ina scola: The School of Life - el sustegna cun quella ina nova visiun d'educaziun. Ses nov cudesch sa cloma Religion für Atheisten ed è cumparì il 2011/2012.

Jérôme Meizoz

Jérôme Meizoz Bild in Lightbox öffnen.

Legenda da maletgs: Jérôme Meizoz mad

Jérôme Meizoz, scriptur e scienzià a l'Universitad da Losanna, è in amatur da Rousseau, al qual el ha gia deditgà in essai (Le gueux philosophe, Antipode) e numerus artitgels. Questa passiun ha el ertà da ses tat che ha, en onur dal scriptur, dà num a ses figl Jean-Jacques. Jérôme Meizoz ha imaginà, partind da fatgs documentads, in inscunter tranter Rousseau, che ha visità il 1754 la cascada Pissevache il Vallais Sut, ed il spiritual local. Quel scriva otg onns pli tard ina brev a Rousseau exprimind, quant surstà ch'el è da quai ch'el è vegnì a savair da Rousseau areguard la religiun. Cun ils pleds dal vicari ans intermediescha l'autur il punct da vista pauc enconuschent che la Baselgia catolica aveva da lezzas uras envers Rousseau.

Odile Cornuz

Odile Cornuz Bild in Lightbox öffnen.

Legenda da maletgs: Odile Cornuz mad

Er Odile Cornuz, poetessa lirica, dramaturga e docenta a l'Universitad da Neuchâtel, è averta per l'ambiguitad dal caracter da Rousseau ch'ella ha scuvert surtut via ils texts Rousseau juge de Jean-Jacques e Träumereien des einsamen Spaziergängers. Ella citescha el e dumonda el e sasezza sco eco: "Rousseau, cun tge fas ti rima?", "Rousseau, tge signifitga quai?". En sia brev en furma d'in ritornel che gioga cun suns e ritmus, emprova ella da respunder questas dumondas.

Guy Poitry

Guy Potry Bild in Lightbox öffnen.

Legenda da maletgs: Guy Potry mad

Guy Poitry, autur e docent a l'Universitad da Genevra, ha tschernì da s'adressar a Rousseau en il num dad Emile. Quest Emile che n'exista betg mo sin palpiri, reproscha a ses autur d'al avair "tegnì en il mund irreal da la ficziun" e d'avair bandischà enturn e surtut en el "tut il feminin". Emile fa ina tscherta sort dad "outing", nua ch'el crititgescha las ideas da Rousseau pertutgant l'educaziun da mats e mattas.

Sylviane Dupuis

Sylviane Dupuis Bild in Lightbox öffnen.

Legenda da maletgs: Sylviane Dupuis Keystone

Sylviane Dupuis, la manadra da la Maison de Rousseau et da la Littérature a Genevra, è docenta, dramaturga e poetessa lirica. Ils 19 d'avrigl da quest onn ha ella retschet il Prix Pittard de l'Andelyn per sia ovra Poème de la méthode (chasa editura Empreintes). Cun ses text Brief an Jean-Jacques Rousseau über die heutige Zeit sa drizza ella a dus destinaturs: a Rousseau ed a Jean-Jacques. Rousseau giuditgescha davart Jean-Jacques. Grazia a questa duplicitad, a questa imaginaziun dubla, possia el "giugar tut las rollas" e "sa legrar en il zuppà da sia schientscha dubla". Quai dettia perditga da la modernitad da l'autur. E saja a medem temp l'origin da sia ambiguitad. Pudessan ses siemis e sias utopias sa sviluppar, sch'els sa realisassan, a noss menders dischariels? Sylviane Dupuis sa fa patratgs davart questa tematica ed intimescha il scriptur e filosof da returnar e surpigliar sia responsabladad.