Dunnas pretendan pajas gistas per tuts

Punct las 14:06 han dunnas en l'entira Svizra fatg in concert da tschivlar per uschia crititgar las differenzas da paja tranter um e dunna.

Di d'acziun per pajas gistas a Cuira. Bild in Lightbox öffnen.

Legenda da maletgs: Di d'acziun per pajas gistas a Cuira. RTR, P. Bundi

Malgrà grondas stentas da mobilisar en tut las grondas citads, hajan be in pèr tschient dunnas fatg part al concert da tschivlar. Quai rapporta l'agentura da novitads SDA cun sa referir sin correspundents al lieu. Surtut dunnas sur 40 onns sajan stadas da la partida. Las radund 50 organisaziuns che han organisà il di da chauma ed acziun da las dunnas aveva repartì radund 40'000 tschivlots. "Achtung. Fertig. Frauen los!" En la Svizra gudognan ils umens anc adina 20 pertschient dapli che las dunnas che fan la medema lavur. Perquai èn las dunnas idas sin via oz en l'entira Svizra. Las acziuns han gì il motto: "Achtung. Fertig. Frauen los!". Sper pajas pli gistas, pretendan las dunnas er ina meglra cumpatibilitad da famiglia e professiun.

Marsch da "High Heels" a Cuira A Cuira han dunnas fatg attent sin lur pretensiuns cun in'acziun da stans ed in marsch da "High Heels". La centrala da dunnas grischuna ha plazzà ses stan d'infurmaziun sper il bajetg dal cussegl grond. Annetta Simeon, giurista e cussegliadra giuridica da la centrala grischuna da dunnas, ha accentuà envers l'agentura da novitads SDA l'impurtanza da la lescha d'egualitad ch'è en vigur dapi il 1996. I dovria autoritads che fan valair la lescha uffizialmain. Per il sindicat UNIA èn marschadas radund in tozzel dunnas en "High Heels" davent da la staziun dal tren enfin la chasa dal cussegl grond. Ellas han pretendì tranter auter ina paja minimala da 4'000 francs.

1991 avevi num "Wenn frau will, steht alles still".

Placat da la chauma da dunnas 1991. Bild in Lightbox öffnen.

Legenda da maletgs: Placat da la chauma da dunnas 1991. RTR

Avant exact 20 onns èsi stà l'emprima giada che las dunnas èn idas a demonstrar en Svizra. Il motto da l'emprima chauma da dunnas da lezza giada era "Wenn frau will, steht alles still". (fa/sda)

Fotogalaria: di da chauma e d'acziun da las dunnas a Cuira