Il camiun da "Paula fliegt" è rut

Il camiun da pumpiers da l'ensemble da teater "Paula fliegt" è rut. Sco quai che l'actura Sara Francesca Herman ha ditg, dettia quai in defect tecnic ch'è succedì avant in per dis sin il viadi da Arosa a Vrin. L'ensemble spera ussa, ch'il defect po vegnir reparà uschè spert sco pussaivel.

La turnea da "Paula fliegt" da quest onn sa ferma en dapli che 30 lieus da la Svizra, en tut èn planisadas radund 50 preschentaziuns en ils chantuns Grischun, Turitg, Tessin, Schaffusa e Basilea. La gruppa ta teater è vegnida furmada la primavaira dal 2010. Ils acturs èn tuts acturs da professiun. Il toc clownesc da quest onn sa numna Alarm. En il toc emprova ina truppa da pumpiers (Roberto Chiriatti, Sara Francesca Hermann, Jan Pezzali, Martina Rüegg) da sa profilar tar ils pumpiers. L'emprim engaschi na grategia dentant betg dal tut. (rtr/fb)

Viver sco actura libra è dir ma cuntentaivel

Sche la Sara Francesca Hermann raquinta in'istorgia sin ina tribuna, lura fa ella quai cun corp ed olma. La giuvna da 28 onns, oriunda da Samedan, ha numnadamain studegià a la scola Comart a Turitg actura da moviment. Quai vul dir ch'ella fa teater, acrobatica, musica, cabaret ed ella chanta e sauta.

"Paula fliegt" tras il Grischun

Atgnamain stizzan ils pumpiers il fieu. Ils 5 pumpiers da la gruppa d'acturs "Paula fliegt" vulan dentant gist il cuntrari, els vulan svegliar il fieu en ils aspectaturs ed en las aspectaturas. Questa finamira vulan els cuntanscher cun lur teater sin via ch'è en turnea tras il Grischun. Il toc "Zunder" porscha teater, acrobatica, chant, saut, musica, magia e slapstick. Redacziun: Angela Hitz