Passar sur il pass: Sur dal San Bernardin ed il scumond dad ir cun auto en il Grischun!

Senza auto èn ins pers en il Grischun! Quai vegniva pretais pli baud e quai vegn pretais per part anc oz. Er sche blers renunzian ozendi ad in agen auto. Nus cun tantas muntognas e pass e vias principalas e lateralas stuain bain avair in auto. Ma gist precis en il Grischun èsi stà scumandà dad ir cun auto fin l'onn 1925. Suenter diversas votaziuns fitg dispitaivlas è l'auto vegnì permess e dapi quest di circuleschan adina dapli autos sin las vias grischunas. Ina da las vias cun il pli grond traffic è la via vers sid tras il tunnel dal San Bernardin ch'è vegnida inaugurada l'onn 1967. L'istorgia dal tunnel e l'istorgia da l'auto en il Grischun èn ils temas da la proxima ediziun dal "Sas anc?" la seria da stad da la Televisiun Rumantscha.

Da nagliur vers dapertut

Il chantun Grischun è enconuschent per ses numerus lais, ses flums, culms e sias punts. In viadi tras noss chantun muntagnard mussa dentant ch'il Grischun è era in chantun da las vias.

Muntognas e pass en Grischun - sur dad autos, vias e viadis

Pli baud: autos sin viadi en il Grischun Bild in Lightbox öffnen.

Legenda da maletgs: Pli baud: autos sin viadi en il Grischun RTR

Dad alpinists e cristals, da muntognas e pass, da chapellas e chors. Co tunavi avant decennis en nossas vals? Co veseva il Grischun d'antruras ora? Il Radio Rumantsch fa durant la stad viadis nostalgics en il passà. Questa giada: Muntognas e pass en Grischun - sur dad autos, vias e viadis.

L'arrivada da l'antipatic bau

"L'arrivada da l'antipatic bau", aveva num in'emissiun che Pieder Simeon aveva fatg l'onn 1988. Simeon aveva prendì quest titel or d'ina poesia da pader Alexander Lozza, ch'aveva cundunà l'automobil sco bau antipatic e quai da temp ch'ils autos eran anc rars sin las vias grischunas. Anc pli remartgabel è il fatg che fin l'onn 1925 era perfin scumandà d'ir cun l'auto en noss chantun. Dal 1988 aveva Simeon anc chattà umens che sa regurdavan dals emprims autos ch'i han vis ed eran fascinads, ma er da quels ch'i aveva spaventà pervi da quests scaravatgs motorisads.