Laina Viva – Istorgia en furma divertenta

En occasiun dal 100avel onn d'existenza dal Parc Naziunal Svizzer vegn preschentà in gieu liber scrit aposta da Simon Engeli per il giubileum. Ensemen cun la Theaterwerkstatt Gleis 5 han exercità radund 30 acturs laics da l'Engiadina e la Val Müstair il toc sut la batgetta da Giuseppe Spina.

Cun Flurin Caviezel en la rolla da Steivan Brunies, il co-fundatur dal parc, vegn l'aspectatur dal teater manà en l'istorgia dal passà en moda e maniera divertenta. La fundaziun istorica dal parc avant 100 onns - cun tut ses incaps e sias sfidas - pliras persunalitads impurtantas e decisivas per il success, sco er l'opposiziun en il ravugl da la populaziun engiadinaisa inscuntran Brunies e dus turitgais durant lur viadi da temp. Il spectacul "Laina Viva" è in dals pli gronds eveniments culturals en Grischun ed ha in budget da 680'000 francs. La premiera ha lieu ils 11 da fanadur a Zernez. Las 16 represchentaziuns duran fin ils 16 d'avust 2014 (rtr/ac)