7avla terrada per proporz

Il cussegl grond vegn er en il futur elegì tenor la procedura da maiorz e betg tenor la procedura da proporz. Il suveran grischun ha refusà cleramain cun 40'104 vuschs (56,1%) l'iniziativa chantunala dal pievel "Per elecziuns gistas", l'iniziativa da proporz. Gea han ditg 31'382 (45,9%) dals votants. La participaziun a la votaziun giascheva tar 59,14 %.

Nagina schanza per l'iniziativa da proporz. Bild in Lightbox öffnen.

Legenda da maletgs: Nagina schanza per l'iniziativa da proporz. RTR

Comité ProProporz è trumpà dal na Il comité independent ProProporz è trumpà dal na a l'iniziativa da proporz. Sco quai ch'il comité scriva en ina communicaziun, hajan els dentant d'acceptar la terrada. Iniziativa lantschada d'in comité independent L'iniziativa era vegnida lantschada d'in comité independent cun represchentants da la PS, PPS, PVL e dals Verds. Las pli pitschnas partidas sa sentivan discriminadas cun il sistem da maiorz e s'han empermess dal proporz dapli sezs en il parlament. Las partidas grondas PBD, PCD e PLD han cumbattì cunter la midada.

Ils parlamentaris dal Grischun vegnan era vinavant elegids tenor il sistem da maiorz. Bild in Lightbox öffnen.

Legenda da maletgs: Ils parlamentaris dal Grischun vegnan era vinavant elegids tenor il sistem da maiorz. mad

Proporz tema dapi 1937 Il proporz è adina puspè tema en il Grischun. Dapi l'onn 1937 ha il suveran grischun gì da votar 7 giadas davart sia introducziun. Mintga giada èn ils Grischuns sa decidids per il maiorz. En Svizra è l'elecziun da maiorz in model restant. Sper il Grischun vegn il maiorz anc applitgà en las elecziuns da parlament en l'Appenzell Dadens. Cussegl grond cunter iniziativa L'iniziativa da proporz avess pretendì da midar la procedura per eleger il cussegl grond da la metoda actuala da maiorz a la procedura da proporz. La nova procedura avess duì vegnir applitgada per l'emprima giada tar las elecziuns dal cussegl grond l'onn 2014. Il cussegl grond aveva refusà questa iniziativa. Proporz sco schanza per partidas pitschnas Tenor ils aderents da l'iniziativa da proporz, vegnissan ils sezs en il parlament repartids tenor la forza da las singulas gruppaziuns che sa participeschan sco glistas electoralas. Uschia vegnia la voluntad dal pievel resguardada meglier, perquai ch'er gruppaziuns e partidas pli pitschnas tschiffassan ina schanza d'esser preschentas en il cussegl grond. (rtr/sda/fa)