Ladina Heimgartner è la nova directura da RTR

Radiotelevisiun Svizra Rumantscha ha ina nova directura. Ladina Heimgartner (33) è vegnida elegida unanimamain dal cussegl d'administraziun da la SRG SSR sco successura da Mariano Tschuor.

Da san.: Mariano Tschuor, il directur actual da RTR; Oscar Knapp, il president da la SRG.R; Ladina Heimgartner, la directura futura da RTR; e Roger de Weck, il directur general da la SRG SSR. Bild in Lightbox öffnen.

Legenda da maletgs: Da san.: Mariano Tschuor, il directur actual da RTR; Oscar Knapp, il president da la SRG.R; Ladina Heimgartner, la di... RTR, J. Clopath

En mintga cas in fitg bel sentiment saja quai da turnar, di Ladina Heimgartner. Ella sa legria da turnar en il Grischun, en sia patria e natiralmain saja ella er in zichel loscha d'esser l'emprima directura rumantscha. Pronta per il timun Memia giuvna per questa plazza na saja ella betg cun ses 33 onns, di Heimgartner cun persvasiun. "Jau hai ussa l'impressiun che jau hai pudì ramassar ils ultims onns, gist er durant il temp a Berna, las experientschas ed ils instruments ch'jau dovra ed jau ma sent pronta per surpigliar il timun tar RTR." Pli datiers per sentir ils giavischs Tge che vegna tut a sa midar cun ella sco nova directura na sa ella betg anc concretisar. En mintga cas veglia ella promover in zichel la proximitad cul publicum, pia da vegnir pli fitg en contact cun lez ed udir tge che lur ideas, desideris e giavischs èn. RTR duai en mintga cas restar er cun ella ina bella, simpatica e cumpetenta fanestra ora vers la Svizra. Cun grondas midadas na stoppian ins dentant betg quintar il proxim temp quai che pertutga il program - in grond punct vegnia ad esser il tema da la digitalisaziun. Sis annunzias en tut Losch e cuntent che RTR ha ina nova directura è er Oscar Knapp, il president da la SRG.R ch'ha proponì Heimgartner al cussegl d'administraziun. Ch'ella saja ina dunna, na saja betg stà la raschun ch'ins haja tschernì Ladina Heimgartner. La raschun sajan cler sias cumpetenzas che hajan persvadì. In um che saja stà megliers ch'ella n'haja quai betg dà tranter las 6 annunzias per il post dal directur. Tgi è Ladina Heimgartner? Ladina Heimgartner ha 33 onns ed è oriunda da Scuol, nua ch'ella ha era visità la scola. Silsuenter ha ella fatg la matura a l'Institut Otalpin a Ftan e pli tard ha ella studegià germanistica e litteratura rumantscha a l'Universitad da Friburg. Il studi ha Heimgartner terminà cun il licenziat lic. phil. I en germanistica e rumantsch. La carriera tar la SRG SSR Il 2007 ha Ladina Heimgartner cumenzà sia carriera tar la SRG SSR. Ella daventa redactura dal Radio Rumantsch ed in onn suenter è ella manadra dal ressort "Reflexiun". Dal 2010 fin 2011 è Heimgartner ultra da quai stada substituta dal schefredactur da RTR. Actualmain maina Ladina Heimgartner la partiziun "Martgads e qualitad da la direcziun generala da la SRG SSR" a Berna. Ladina Heimgartner surpiglia il post da directura sin l'emprim d'avust 2014. (rtr/gc/fc/aw)

Impressiuns da la conferenza da medias en chasa RTR

(RR novitads a las 8:30)

Mariano Tschuor banduna RTR

Sin proposta dal directur general Roger de Weck ha il Cussegl d'administraziun da la SRG SSR elegì oz Mariano Tschuor, directur RTR Radiotelevisiun Svizra Rumantscha, sco manader d'ina nova partiziun da stab cun cumpetenzas schlargiadas.