Fusiunar u separar

Er quest onn han 28 vischnancas decidì da fusiunar cun autras. Cun il consentiment dal Cussegl grond ha il Grischun l' emprim da schaner 2015 anc 125 vischnancas. La direcziun è clera: Tar las vischnancas vegn maridà. E co statti cun ils divorzis?

Sco tar las nozzas ston era tar ina fusiun tut ils partenaris dir gea. Bild in Lightbox öffnen.

Legenda da maletgs: Sco tar las nozzas ston era tar ina fusiun tut ils partenaris dir gea. RTR

Fiss cun tut las fusiuns er da quintar cun l'ina u l'autra separaziun? Pudessi dar fracziuns che na sa sentan cumplettamain betg da chasa en la nova structura? E vulan perquai turnar en l'independenza? Ni almain midar dad ina vischnanca tar in'autra? Dumondas teoreticas Ursin Fetz da la scola auta HTW sa fatschenta ed accumpogna process da fusiuns da vischnancas. La dumonda d'ina separaziun pussaivla auda el mintgatant en vischnancas che sa chattan en in process da fusiun - dentant be avant la fusiun. Suenter saja quai nagin tema pli. Las dumondas da separaziuns da vischnancas èn per Fetz el mument dumondas spiramain teoreticas. La separaziun - il trend da pli baud Ina situaziun diversa cun bleras midadas devi il 19avel tschientaner. Tranter l'onn 1851 e 1881 èn ils 48 cumins sa spartids en 224 vischnancas politicas. Tenor Simon Theus da l'Uffizi da vischnancas dal Grischun è quai stà in temp fitg interessant, e separà ins haja surtut per raschuns economicas. (rtr/rm/hs)