"I renda dad esser criminal en l'Africa dal Sid"

La criminalitad è in dals quitads principals en l'Africa dal Sid, il pajais ospitant dal campiunadi mundial da ballape da quest onn. Johan Burger da l'Institut per studis da segirezza a Pretoria preschenta in'analisa davart la violenza indigena che turmenta il pajais.

La criminalitad è in dals quitads principals en l'Africa dal Sid Bild in Lightbox öffnen.

Legenda da maletgs: La criminalitad è in dals quitads principals en l'Africa dal Sid Reuters

La provinza Gautong, la pli impurtanta regiun economica da l'Africa dal Sid, patescha d'ina menda acuta: la criminalitad. A Johannesburg, la pli gronda citad dal pajais, vegnan commess fin deschset mazzaments a di. La paranoia da segirezza che accumpogna questa menda reala è spectaculara. Ils mirs da protecziun che circumdeschan las chasas da la classa d'amez disponan savens d'ina protecziun supplementara cun in cabel electronic. Avant ch'ins po entrar en ina chasa ston ins per regla avrir quatter u tschintg ischs cun differentas clavs. A Pretoria, nua che sa chatta la sedia da la regenza, èn ils edifizis da persunalitads impurtantas circumdads da pliras barrieras segiradas cun electricitad. Savens èn ellas fin 10 meters autas. Mintgatant vegnan ellas schizunt separadas d'in foss che vegn illuminà la notg. Johan Burger lavurava antruras sco policist. Oz lavura el en l'Institut per studis da segirezza. L'institut, che giauda en l'Africa dal Sid ina gronda credibladad, è independent e vegn sustegnì finanzialmain da la Svizra.

swissinfo.ch: Pertge è la societad en l'Africa dal Sid uschè violenta? Johan Burger: Per mai datti duas explicaziuns principalas. L'emprima sa referescha a l'istorgia da noss pajais marcada da violenza. Durant decennis essan nus stads involvids en conflicts, era sur noss cunfins ora. Blers giuvens militants dals moviments da liberaziun nairs han absolvì in trenament militar. Pir dapi il 1994 viva l'Africa dal Sid uffizialmain en pasch. Numerusas armas circuleschan però anc adina. Nus avain constatà che blers dals gronds delinquents han frequentà in tal trenament militar. L'auter factur decisiv è il foss tranter ils ritgs ed ils povers che daventa pli e pli grond. Las spetgas d'ina gronda part da la populaziun na vegnan betg adina ademplidas. Dapi var 20 onns empermett'ins a las abitantas ed als abitants dals townships il provediment cun aua ed electricitad e l'access ad in'existenza degna. Ma i na capita nagut. Sa chapescha che la frustraziun evochescha violenza.

swissinfo.ch: Sa sviluppa la criminalitad sin fundament da la povradad? Johan Burger: En mintga cas quai che pertutga ils enguladitschs. En il rom dad in studi che nus avain fatg en l'ambient da giuvens laders avain nus pudì constatar che la maioritad n'era gnanc conscienta d'avair commess in act punibel. Sche Vus vivais ad Alexandria, in pover township en il nord da Johannesburg, e vesais mintga di ils vehichels champesters luxurius che charreschan vers Sandton – in dals quartiers ils pli ritgs da la citad – schais Vus a sasez ch'era Vus hajas merità in toc da la turta. Il pli simpel survegnis Vus quel cun violenza.

swissinfo.ch: Co po l'Africa dal Sid surventscher quest problem? Johan Burger: Quai na vegn betg ad esser simpel. Ins sto meglierar las cundiziuns socio-economicas per la gronda part da la populaziun, però porscher il medem mument ina clera resposta concernent la criminalitad. Da preschent è il sentiment d'esser nunchastiabel enorm: intgins criminals concedan d'avair commess passa tschient enguladitschs avant ch'ins als ha arrestà. Il scleriment da crims è crudà sin in nivel ridicul. Ins sto partir dal fatg ch'i renda dad esser criminal en l'Africa dal Sid. Sche Vus engulais dus vehichels al mais, pudais Vus gia far in bun gudogn.

swissinfo.ch: Signifitga quai che la polizia na fa betg sia lavur? Johan Burger: Ins ha augmentà ils ultims diesch onns il dumber da persunal da la polizia per 60'000 persunas, cunzunt en vista al campiunadi mundial da ballape. Dentant mo paucas da quellas èn ablas da far in'investigaziun. Vitiers vegn che la polizia sidafricana ha pers ils ultims onns bler persunal versà. Per survegnir posts cun responsabladad ston ins avair la dretga colur da la pel. Las abilitads èn main impurtantas. Blers policists alvs han bandunà questa instituziun, sco jau era. Ins di ch'ins na meglierescha betg in sbagl cun l'agid d'in auter. Ins avess stuì chattar in cumpromiss tranter la discriminaziun positiva necessaria e la garanzia da las cumpetenzas. L'auter quità principal pertutga las firmas da segirezza privatas, per las qualas lavuran passa dus terzs (420'000) da las persunas da segirezza dal pajais (inclus la polizia). En plirs cas èsi sa mussà ch'ils agents sezs commettan ils enguladitschs. Empè da schliar il problem vegn el mo engrondì.

swissinfo.ch: Mintg'onn vegnan mazzadas en l'Africa dal Sid passa 18'000 persunas. Tgi èn las unfrendas? Johan Burger: Las unfrendas èn en emprima lingia giuvens nairs tranter 18 e 25 onns. Prest 80 pertschient dals mazzaments vegnan commess en l'ambient famigliar u en il circul d'enconuschents pli stretg. In studi realisà en il township da la provinza dal Cap dal Nord ha mussà ch'ils acts da violenza vegnan cunzunt commess las fins d'emna. Las persunas che vegnan mintgamai pajadas a l'emna turnan da la lavur, baivan sturn e vegnan a pugn. Perquai ch'i circuleschan anc bleras armas da fieu, fineschan talas charplinas savens fatalmain. En general èn ils nairs pli savens unfrendas d'acts da violenza ch'ils alvs.

swissinfo.ch: Blers fans na vulan betg ir al campiunadi mundial da ballape en l'Africa dal Sid. Ston els effectivamain temair da betg esser segirs? Johan Burger: Jau sun persvas che l'Africa dal Sid è in lieu segir durant il campiunadi mundial da ballape. Las autoritads han preparà tut ils meds necessaris per defender tut las smanatschas. Ils fans duain però esser attents, cunzunt sin las vias en vischinanza dals stadions. Ils enguladitschs sin via muntan a 60 pertschient da tut ils enguladitschs cun violenza. Jau hai per exempel cusseglià als fans ollandais da trair or e metter davent lur tricot, cura ch'i bandunan il stadion. Igl è nunnecessari da s'exponer demonstrativamain sco turist che ha eventualmain blers raps en satg. Samuel Jaberg, Pretoria, swissinfo.ch