Sbittà omadus projects dal GESAK

La populaziun da Cuira refusa omadus projects dal concept dals implants da sport GESAK. Entant ch'il project da la halla da glatsch e ballape (credit 36,9 milliuns francs) è vegnì refusà cun ina differenza da sulettamain 300 vuschs, è il project da la halla da sport multifuncziunala sco center naziunal dal unihockey (credit da 46,3 milliuns francs) vegnì refusà cleramain.

Discurs cun il president da la citad da Cuira, Urs Marti, davart la decisiun GESAK-tsg-20140209

Piz a cup: 300 vuschs han decidì Per la halla da glatsch e ballape han 6'311 persunas ditg gea e 6'616 persunas na. Il center naziunal d'unihockey è vegnì sbittà cun 7'680 na cunter 5'201 gea.

Bild in Lightbox öffnen.

Legenda da maletgs: RTR, D. Berther

Na consultativ datti mo per il tennis... Plinavant ha la populaziun da Cuira pudì exprimer sia opiniun davart ulteriurs 5 projects en connex cun il GESAK, quai en las votaziuns consultativas. I ha dà ils suandants resultats: -Project patinera Quader: custs d'investiziun probabels 320'000 francs Gea: 9'366 Na: 3'536 -Project bogn avert Sand: custs d'investiziun probabels 4,8 milliuns francs Gea: 8'286 Na: 4'558 -Project indrizs da tennis: custs d'investiziun probabels 8,9 milliuns francs Gea: 5'422 Na: 7'211 -Project halla da nudar mobila ("Traglufthalle"): custs d'investiziun probabels 400'000 fr. Gea: 8'094 Na: 4'581 -Project sanaziun dal bogn cuvert e bogn avert: custs d'investiziun probabels 17,35 milliuns francs Gea: 8'932 Na: 3'852

Remplazzar il cussegl da scola cun ina cumissiun da furmaziun Questa revisiun da la constituziun ha il suveran da Cuira approvà cun 7'352 cunter 4'431 vuschs. La cumissiun da furmaziun vegn elegida dal cussegl communal. Ella consista dad 8 persunas ed ina presidenta u in president. Almain 5 commembers da la cumissiun ston esser commembers dal cussegl communal. 2 Persunas duain esser persunas dal fatg externas. Funcziun cusseglianta ha il manader dal departament da scola da la citad da Cuira, in represchentant da la direcziun da scola sco era in delegà da la magistraglia. Plan da quartier patinera veglia Calanda Cun 10'856 cunter 1'792 vuschs ha la populaziun approvà cleramain il plan da quartier per l'areal da la patinera veglia Calanda. Quel cuntegna las premissas per la furmaziun da l'areal. Previs è ina surbajegiada cun 7 chasas da mintgamai 4 auzadas ed ina garascha sutterrana. En duas da questas chasas èn previsas abitaziuns favuraivlas. L'areal da 11'396 m2 duai vegnir surdà en dretg da bajegiar a la societad da construcziun da la citad da Cuira. (cdm/hs)

(RR novitads a las 16:00)